Урал сасси
+27 °С
Уҫҫӑнах
Пур хыпар та
Ырă пуçару
6 Ноябрӗн 2018, 14:20

Яла йывăçсем илем кÿрĕç

Малашне Юламан ялĕнчи çуллахи амфитеатр лăсăллă йывăçсен хÿттинче пулĕАлексей Иванов фермер пуçарнипе çак ялта 200 хыр тата чăрăш хунавĕсем лартнă. Ырă ĕçе пурнăçа кĕртме Юламан шкулĕнчи вĕрентекенсемпе вĕренекенсем тата ялта пурăнакансем хăйсен ирĕкĕпе 40 яхăн çын килнĕ.

- Кама мĕнле те, мана вара кăçалхи çулла «Уяв» республика праçникне хутшăнакансемпе хăнасем умĕнче аван мар пулчĕ. Амфитеатр йĕри-тавра пĕр йывăç та çук. Хытă хĕртекен хĕвелтен пытанма пĕр сулхăн вырăн пулмарĕ. Манăн пуçра хунавсем лартас шухăш тахçанах çуралнă. Çак ĕçе тума алă кăна çитмен, – каласа пачĕ Алексей Яковлевич. – Ял Канашĕ пулăшнипе, тинех‚ ĕç вырăнтан хускалчĕ. Хунавсене Çтерлĕри вăрман хуçалăхĕн директорĕ‚ район Канашĕ-н депутачĕ Вазир Сагадиев уйăрса пачĕ. Çакăншăн ăна пысăк тав. Ял тата ун йĕри-тавра илемлĕ те хăтлă пултăр. Çуркунне пирĕн тавралăх панулми‚ чие тата çĕмĕрт çеçкисем айне путтăр... Кашни пÿрт умĕнчи пахчара чăрăшсем валли вырăн тупăнтăр. Мĕншĕн тесен вĕсем хĕлĕн-çăвĕн симĕс лараççĕ. Çакă вара яла хăйне евĕрлĕ капăрлăх сăнĕ кĕртĕ. Тавралăха илемлетме хамăр ял çыннисене чĕнсе калатăп. Нумайăшĕ мана ăнланни сисĕнет‚ çакă питĕ савăнтарать.
Юламансем ырă та пархатарлă ĕç туса ирттернĕ. Виçĕ-тăватă çул иртсен хунавсем çÿлелле çĕкленĕç. Пурăна киле вара куçа тата чуна савăнтарса пысăк йывăçсем кашласа ларĕç.
Валерий АЛЕКСЕЕВ.
Авăркас районĕ.
Читайте нас: