«Атайсал» проект витĕмĕпе икĕ палăк уçнă

Паттăр салтаксен ырă ячĕсене нихăçан та манăçа кăларма паман гранит хăмасене Треппел тата Веселовка ялĕсенче вырнаçтарнă. Треппел шкулĕн территорийĕнчи композицие обелиск тата салтак скульптури илем кÿнĕ. Вĕсен авторĕсем - Ĕпхÿ хулинче чылай арт-объект хатĕрленĕ Халит тата Тимур Галиуллинсем.

Палăксене уçассипе çыхăннă церемоние район администрацийĕн представителĕсем, депутатсем, вырăнта пурăнакансемпе сумлă хăнасем хутшăннă. Вĕсем пурте патриотизм пĕлтерĕшне тата ветерансен паттăрла ĕçĕсене хисепленине палăртнă. Хăнасем çакăн йышши пуçарулăх çамрăк ăрура патриотизм туйăмне аталантарма пулăшассипе те килĕшнĕ.

 - Пирĕн районта хăйсен пĕчĕк Тăван çĕршывне темиçе теçетке çул хушши пулăшу паракан пысăк та ырă чĕреллĕ çынсем пур. Авăркас çыннисем Василий Федорова «Салават» хресченпе фермер хуçалăхĕн ертÿçи, район Канашĕн депутачĕ, «ПР ял хуçалăхĕн тава тивĕçлĕ ĕçченĕ», Салават Юлаев орден кавалерĕ пек пĕлеççĕ. Унсăр пуçне вăл - районшăн, ентешсемшĕн пысăк пĕлтерĕшлĕ проектсене пурнăçа кĕртме пулăшакан çын. Василий Иванович палăк тăвас ĕçĕн пуçаруçи-спонсорĕ шутланать. Унăн ырă ĕçĕсем «Атайсал» проекта кĕнĕ, - тенĕ район администраци пуçлăхĕ Арслан Шагаретдинов.

Мероприяти вĕçĕнче унта хутшăнакансем палăк умне чечексем хурса салтаксене шăплăх минучĕпе асăннă. Ентешсен вăрçăри паттăрла ĕçĕсем яланах асра пулĕç!

Авăркас районĕ, Треппел ялĕ.