Любовка пĕрле ÿснĕ туссене пуçтарчĕ

Палăртнă вăхăт тĕлне вырăнти пĕве патне, мероприятие унта ирттерме йышăннăччĕ, ял çыннисемпе уяв хăнисем пуçтарăнма пуçларĕç. Машинăсем пĕрин хыççăн тепри килсе çитрĕç. Çутă хĕвел пăхни те кăмăла çĕклерĕ, ир çинчен тÿпене хура пĕлĕт хупăрласа илсе çумăр пĕрчисем ÿкме пуçланăччĕ. Тĕлпулу вырăнне ахальтен суйласа илмен. Ял пĕви питĕ илемлĕ çĕрте вырнаçнă. Ĕлĕк Любовка çамрăкĕсем каçхи вăйăсене çакăнта ирттернĕ. Тахçанах асаттесемпе асаннесем пулнăскерсем кунта хăйсене темиçе сехетлĕхе 17-18 çулхи çамрăксем пек туйрĕç.
Мероприяти «Тăван çĕршывăм» юрăран пуçланчĕ. Юрра Мускав хулинчен ашшĕ-амăш патне хăнана килнĕ Юлия Патраева шăрантарчĕ. Юлия Любовка ялĕнче çуралса ÿснĕ. Вăл – пирĕн пысăк çăлтăр, Пĕтĕм тĕнче тата Раççей шайĕнчи мероприятисен лауреачĕ. Тăван яла отпуска килсен ял çыннисем валли «Чĕре юррисем» ятлă концерт та йĕркелерĕ. Июль уйăхĕн 13-мĕшĕнче Толбазă ялĕнче иртнĕ Уяв регионсем хушшинчи чăваш культурин фестивальне хутшăнчĕ, унта хăй номинацийĕнче пĕрремĕш вырăн çĕнсе илчĕ.
Мероприятие Шупашкар хулинчен Игорь Иванов эстрада юрăçи килсе çитрĕ. Ăна ял халăхĕ лайăх пĕлет тата кăмăлласа йышăнчĕ. Вăл Вячеслав Христофоровăн ушкăнĕпе пирĕн патра пĕр хутчен çеç пулман. Часах сцена çине Тагзима Юлдашева, Елена Маркелова, Людмила Москалюнец уйрăм юрăçсем тухрĕç. Çавăн пекех уяв хăнисене илемлĕ номерсемпе Ямансас ялĕнчи «Палан» чăваш халăх ансамблĕ, Косяковка ялĕнчен килсе çитнĕ «Селяночка», Усăллă ял библиотекинчи «Вучах» ансамбльсем савăнтарчĕç. «Палан» ушкăн «Урам айкки кăвак çеçке» юрра шăрантарнă май уяв хăнисем вăйă карти йĕркелерĕç.
Чаплă лару-тăрура вăрăм ĕмĕрлĕ Александра Семеновна Кириллована 90 çулхи юбилей ячĕпе, Демьян Васильевичпа Антонида Кузьминична Михайловсене 65 çул пĕрле пурăннă ятпа саламларĕç. «Çулталăк юбилярĕсем» номинацире çак ялта çуралса ÿснĕ, ĕмĕрĕ тăршшĕпе водитель пулса ĕçленĕ Иван Николаевич Агафонова 75 çулхи юбилейпе, тăван çĕрне чунтан хисеплекен, хăй суйласа илнĕ профессине ĕмĕрĕ тăршшĕпех шанчăклă юлнă Игорь Демьянович Михайлова 55 çул тултарнă ятпа, Татьяна Кирилловна Кирилловапа Андриян Емельянович Иванова 50 çулхи юбилейĕсем ячĕпе саламларĕç. Унсăр пуçне Любовкăри кашни киле Çемье çулĕпе саламласа заварка пĕçермелли чейниксем парнелерĕç. Саламламалли номинацисем тĕрлĕрен пулчĕç: «Тăван яла шанчăклă пулнăшăн», «Суйласа илнĕ профессие шанчăклă пулнăшăн», «Тăван яла юратнăшăн», «Ялта пурăнакан чи кĕçĕн çын».
«Нумай ача амăшĕ» номинацире Тав çырăвĕсемпе парнесене Вера Васильевна Иванова, Татьяна Кирилловна Кириллова, Маргарита Давыдовна Иванова тивĕçрĕç. Ивановсем ултă ача çуратса ура çине тăратнă. Пурте тивĕçлĕ çынсем пулса çитĕннĕ, çемьеллĕ. Амăшĕ патне килсе çÿреççĕ, пулăшаççĕ. Шăпах Ивановсен çемйи мероприятие кăмăллă лару-тăру, хаваслă туйăм парнелерĕ. Вĕсем пур конкурссене те, вăйăсемпе ташăсене те хутшăнчĕç. Кирилловсем пилĕк ывăла кун-çул парнелесе ура çине тăратнă. Тăваттăшĕ салтакра пулса килнĕ, ĕçлеççĕ. Кĕçĕнни хальхи вăхăтра Санкт-Петербург хулинче салтак тивĕçĕсене пурнăçлать. Даниловсем пилĕк ача çитĕнтернĕ. Вĕсем пурте тăван çĕр çинче тĕпленнĕ. Александр, Иван тата Роза Чуртан ялĕнче пурăнаççĕ. Вĕсем ашшĕпе амăшĕн профессийĕсене малалла тăсаççĕ. Ывăлĕсем ашшĕ пекех механизаторсем. Ака тата тыр-пул пухнă вăхăтра вĕсем яланах малти ретре. Хĕрĕ амăшĕ пекех выльăх-чĕрлĕх ĕрчетес ĕçре тăрăшнă.
Мероприяти тăршшĕпех тĕрлĕ лапамсем – «Пылак мамăк туса пăх», «Хăв аллупа илем» (хăв аллупа бантиксем, çÿç лектермеллисем, вак-тĕвек туса пăхма, мастер-класа хутшăнма, кăмăла кайнă япалана туянма пулатчĕ) – ĕçлерĕç. Наталья Емельянова (Петĕрсен Наташши) сăвăç хамăр таврари сиплĕ курăксен выставкине йĕркеленĕ. Унсăр пуçне вăл Любовкăпа унта пурăнакансене халалласа çырнă сăввисене вуласа пачĕ.
Кăмăл пуррисем «Сибирское здоровье» продукцийĕн выставкипе те паллашма пултарчĕç.
Чуртанри культура çурчĕн ĕçченĕсем ротангсенчен кашпо тума вĕрентрĕç. Библиотека Çемье çулталăкне халалласа «Çемье вăл – кил-çурт. Çемье вăл – тĕнче!» выставка хатĕрленĕ. Усăллăри «Эткер» наци музейĕ чăваш культурипе тумĕн кĕтесне йĕркеленĕ. Кунти япаласене тытса çеç мар, тăхăнса пăхма та юратчĕ, фотозона та ĕçлерĕ. Унсăр пуçне Тăван çĕршывăн Аслă вăрçин «Вăрçăн чĕнмен свидетелĕсем» курав хатĕрленĕ.
Пуçтарăннисене «Çулла парни» урапа та питĕ килĕшрĕ. Çавăн пекех кану лапамĕ те ĕçлерĕ. Унта хаçат çырăннăшăн выляса илнĕ çуллахи чуччусем, гамак чуччусем пурччĕ. «Парнесене касасси» вăйă икĕ тапхăрпа иртрĕ: ачасемпе аслисемшĕн уйрăмшар. Каярах «Командăпа йĕлтĕрпе ярăнасси», «Çăм атă вăркăтасси» интереслĕ вăйăсем йĕркелерĕç. Кулли-савăнăçĕ тем чухлех пулчĕ кунта. Питĕ хаваслă иккен ача чухне пĕрле ÿснĕ туссемпе тĕл пулсан.
Мероприятире тĕрлĕ сăлтавсене пула ялтан урăх çĕре куçса кайнисем те пулчĕç. Вĕсене пĕчĕк Тăван çĕршывĕ хăйĕнчен уйăрса яман, кунта пурăннă чухнехи ырă аса илÿсемпе хăй патнех туртать.
Паллах, мероприятие ертсе пынă Лилия Семеновапа Валентина Патраевана, çÿлерех асăннă артистсене, йĕркелÿçĕсене, тутлă пловпа така какайĕнчен шÿрпе хатĕрленĕ Нина Патраевапа Оксана Васильевана, Соколовсен çемйине, сĕтел хатĕрлеме пулăшакансене, уява хутшăнакансене, пирĕн спонсорсене, «Рощинский» акционерлă обществăна (ертÿçи – Ю.В. Спиридонов), Услинский ял хуçалăх предприятине (Ю.Н. Вахитов) пысăк тав.
Ял çыннисем укçа пуçтарса уяв тĕлне наци эрешĕсемлĕ илемлĕ стела лартрĕç. Ăна яла пырса кĕнĕ çĕртре вырнаçтартăмăр. Халĕ пирĕн хамăрăн илемлĕ вырăн пур. Стела хатĕрленĕ Грандметалл ОООна (Н.Н. Федоров), ял çыннисене уйрăм тав сăмахĕ калатпăр.
Людмила МИХАЙЛОВА, вулавăш ĕçченĕ.
Çтерлĕ районĕ, Любовка ялĕ.