Пушкăртстан парламенчĕ пирки кăсăк фактсем

Парламент икĕ палатăран тăнă
1990-мĕш çулсенче Пушкăртстан парламенчĕ икĕ палатăран тăнă – Закон кăларакансен палати тата Представительсен палати. Вĕсене иккĕшне те пĕр вăхăтрах суйланă. Пĕрремĕш палатăра 40 депутат пулнă, вĕсем яланах парламентра ĕçленĕ. Урăхла каласан ĕç укçи илнĕ. Иккĕмĕш палатăра кашни районпа хуларан суйланă икшер депутат хăйсен тивĕçне пурнăçланă. Вĕсем пурĕ – 156 депутат. Çапла майпа ПР Патшалăх Пухăвĕн пĕрремĕш созывĕнче 196 халăх тарçи пулнă.

Чи пысăк закон
«Пушкăртстан Республикинчи законсем, ПР Патшалăх Пухăвĕпе унăн Палатисен акчĕсем вăя кĕни тата вĕсене пичетре пичетлемелли йĕрке» ятлă закон пĕрремĕш официаллă документ шутланать.
Вăтăр çул хушшинче йышăннă чи пысăк законсенчен пĕри 33297 страница йышăнать. Унăн ячĕ «Пушкăртстан Республинчи муниципаллă пĕрлĕхсен чиккисем, тăрăмĕ тата административлă центрĕсем». Çак закона хут çинче пичетлес тесен 67 тĕрке (пачка) хут кирлĕ.
Танлаштарма калăпăшĕпе тепĕр пысăк закона илсе пăхар. «Пушкăртстан Республикин 2025 çулхи тата 2026-2027 çулсенчи тапхăра палăртнă бюджет» закон 2152 страница йышăнать. Ку вăл 4,5 тĕрке хутпа танлашать.
Паянхи кун Пушкăртстан парламентĕнче 120 депутат ĕçлет, анчах та вĕсенчен хĕрĕхĕшĕ çеç шалу илеççĕ. Вĕсен шутĕнче – спикер, унăн çумĕсем, комитетсен ертÿçисемпе çумĕсем. Ыттисем, сакăр вуннăшĕ, депутат полномочийĕсене обществăлла шайра, хăйсен тĕп ĕç вырăнĕнчи тивĕçĕсене манмасăр, пурнăçлаççĕ. Сăмахран, пĕр-пĕр завод директорне е сумлă тухтăра депутата суйларĕç пулсан, вăл унтах тăрăшать, ĕç укçи илет. Çав вăхăтрах кашни уйăхра кирлĕ чухне хăйĕн комитетĕнче иртекен ларусене, пĕтĕмĕшле пленарлă пухусене хутшăнать. Депутат хăй ĕçлекен вырăнсăр пуçне урăх çĕрте ĕçлеме пултараймасть.

Константин Толкачев – чăн-чăн генерал
Константин Толкачев Патшалăх Пухăвне 26 çул ертсе пырать. Вăл Раççейри чи авторитетлă та сумлă парламентарисенчен пĕри шутланать. Çавăн пекех Константин Борисович федераллă политика тытăмĕнче паллă вырăн йышăнать. Вăл - Федераллă Пуху çумĕнчи РФ законсем кăларакан Канашăн Президиум пайташĕ, Закон кăларакансен Канашĕн наци хăрушсăрлăхĕ тата коррупцие хирĕç кĕрешессипе ĕçлекен комиссине ертсе пырать. Маларах Европа Канашĕнче Раççей интересĕсене те хÿтĕленĕ.
Пиртен чылайăшсем Пушкăртстан спикерĕ хăйĕн карьерине Кузнецкри металлурги комбинатĕнче (Кемерово) сварщикран пуçланине пĕлмеççĕ те. Çарта пулнă хыççăн милици сферинче хĕсметре тăма пуçланă, кунта карьера пусмипе хăпарса генерал-майор звание тивĕçнĕ. Унсăр пуçне юридици наукисен докторĕ пулнине те палăртма кăмăллă.
Унăн киленĕвĕ вара – туризм тата пулă тытма çÿресси. Константин Толкачев хăй çирĕплетнĕ тăрăх, отпуск вăхăтĕнче тус-юлташĕсемпе Пушкăртстанри юхан шывсем тăрăх кимĕпе ишме кăмăллать, хĕлле кÿлĕсенче – уланкă тытма.
Юрий СНЕГОПАД хатĕрленĕ.