90 çулхи ĕç ветеранĕ юбилей саламĕсем йышăннă

Авăркас тăрăхĕнчи Толмачевка ялĕнче пурăнакан Матрена Иванова çак кунсенче 90 çулхи юбилейне паллă тунă. Çулĕсем самаях пулин те чунĕпе ватăлмасть, хавхалануллă кăмăлне çухатмасть вăл, пур япалапа та кăсăкланать. Илья мăшăрĕпе иккĕшĕ ачисен, мăнукĕсен, кĕçĕн мăнукĕсен пархатарĕпе савăнса пурăнаççĕ.

Матрена Ефимовнăна юбилей ячĕпе саламлама Треппел ял хутлăх администрацийĕн пуçлăхĕ Ирина Пашкина, вырăнти культура тата вулавăш ĕçченĕсем пуçтарăннă. Вĕсем юбиляр ячĕпе нумай ăшă сăмахсем каланă, вăрçă тата ун хыççăнхи вăхăтра ĕçленĕшĕн (Матрена вăрçă вăхăтĕнче ача çеç пулсан та аслисемпе пĕр тан тăрăшнă) чунтан тав тунă.

Матрена Ефимовнăн пурнăçĕ – паянхи ăрушăн чăн-чăн ырă тĕслĕх. Мĕнле йывăр пулсан та вăл шанчăкне нихçăн та çухатман, малаллах утнă.