Юрий Шатуновăн тăван тăрăхĕнче шурă розăсен аллейине хывнă

Юрий Шатуновпа пĕр класра вĕреннĕ Ольга Гаврилова пĕлтернĕ тăрăх, малтан машинăсене ялавсемпе тата юрăçăн портречĕсемпе илемлетнĕ авточупу иртнĕ.

 - Кайран краеведени музейĕ çумĕнче «Шурă розăсен ангелĕ» аллея хывнă. Аллея шурă розăсен сорчĕсенчен çеç тăрать. Унта виçĕ тĕрлĕ роза – 40 см пуçласа чи çÿллисем таран – лартнă. Аллея çумĕнчи территорие малтанах тирпей-илем кĕртрĕмĕр, плитасем сарса тухрăмăр. Питĕ илемлĕ пулчĕ,  - палăртнă Ольга Гаврилова.

Аллея варринче Юрий Шатуновăн асăну хăмине вырнаçтарнă. Ăна  уçма паллă юрăçăн пĕрремĕш вĕрентекенне Валентина Ильинична Илюхинана ирĕк панă. 

 - Ытармалла мар аллейăна уçма ирĕк панăшăн пысăк тав. Кĕл чечексем ÿсчĕр, чечекленччĕр, çынсем вара Юрий Шатунов яланах пирĕн чĕрере пулнине пĕлччĕр, асра тытчăр, - тенĕ Валентина Илюхина. Ун хыççăн площадьре пĕр ăру çеç мар пĕлекен Юрий Шатунова халалласа пысăк концерт иртнĕ.