Туслă çемье

Ял варринчен, яла икке уйăрса, Çирĕклĕн çăл шывĕ юхса выртать. Тавралăхĕ кăна мар, çыннисем те ырă, кăмăллă кунта. Сăмахăм ял халăхĕ сума суса хисеплекен Юрий Ильичпа Елена Дмитриевна Ивановсем пирки. Вĕсем пирĕн яла 80-мĕш çулта килсе вырнаçрĕç, унччен Кайраклăра ĕçленĕ. Вăл вăхăтра вĕсен çемйинче икĕ ача çитĕнетчĕ.
Юрий Ильич Кайраклăра çуралса ÿснĕ. Слакпуçĕнчи вăтам шкула пĕтернĕ хыççăн Пелепейри медицина училищине вĕренме кĕнĕ. Унтан ăнăçлă вĕренсе тухнă хыççăн Чеховăра, Кайраклăра çичĕ çул хушши тăрăшнă. Юрий Ильич хăйĕн ĕçне ăста пĕлнипе, чирлĕ çынна кирек хăçан та пулăшма хатĕр пулнипе палăрса тăнă. Юлашки çулсенче вăл шкул директорĕ пулса ĕçлет.
Мăшăрĕ, Елена Дмитриевна, Пелепейри педагогика училищине пĕтерсе шкулта ĕçлеме пуçланăранпа часах чĕрĕк ĕмĕр çитет. Вăл вырăс тата чăваш чĕлхисене вĕрентет. Вĕсем Юрий Ильичпа 1972 çулта пĕрлешнĕ. Хальхи вăхăта илес пулсан, Ивановсен ачисем ÿссе çитĕннĕ ĕнтĕ. Асли, Мишша, Пелепейри ял хуçалăх техникумĕнче вĕренет. Хĕрĕ, Алена, кăçал çиччĕмĕш класс пĕтерчĕ.
Туслă, телейлĕ çемье, теççĕ Ивановсем пирки Çирĕклĕре. Тĕрĕсех калаççĕ. Çавăн пек туслă çемьесем пирĕн хушăра ытларах пулсан çут тĕнчере пурăнма та ырăрах, лайăхрах пулнă пулĕччĕ, Çапла мар-и?
А.ИВАНОВА, ĕç ветеранĕ.
Элшей тăрăхĕ.
«Урал сасси», 1996 çул.