«Раççей чăваш пики» йыхравлать

Унта 14-26 çулхи (качча кайман, ачасăр) хĕрсем хутшăнма пултараççĕ. Конкурса хутшăнакансен тăван чĕлхепе калаçмалла, чăваш халăх историне, культурипе йăли-йĕркине лайăх пĕлмелле, сцена культурипе артист, ăс-хакăлпа пултарулăх ăсталăхĕ пуррипе уйрăлса тăмалла.
Конкурс ЧР Культура, национальноç ĕçĕсен тата архив ĕçĕн министерстви пулăшнипе иртет.
Иртнĕ çулсенчи «Раççей чăваш пики» çĕнтерÿçисене конкурса хутшăнтармаççĕ, финала тухайманнисен çеç тепĕр хут вăй виçсе пăхма ирĕк пур. Хĕрсен илемлĕх ăмăртăвне декабрь уйăхĕн 13-мĕшĕнче килсе çитсе Чăваш наци конгресĕнче регистраци иртмелле, участниксене хатĕрлемелли программăпа тата конкурсăн йĕркипе паллашмалла. Пикесен заявкăпа пĕрлех 3000 (виçĕ пин) тенкĕ взнос укçи тÿлемелле.
Конкурс икĕ тапхăрпа иртет: пĕрремĕшĕ – район, хула, регион шайĕнче, иккĕмĕшĕ – юлашки тапхăр (Раççей шайĕнче). 10 000 ытла чăваш халăхĕ пурăнакан Раççей Федерацийĕн субъекчĕн виçĕ участник тăратма ирĕк пур.
Конкурсăн юлашки тапхăрĕ декабрь уйăхĕн 14-мĕшĕнче Шупашкар хулинче, 11.00 сехетре пуçланать.
Конкурса хутшăнма кăмăл тăвакансен заявкăсене 2024 çулхи декабрь уйăхĕн 2-мĕшĕччен тăратмалла. Вĕсене e-mail урлă с[email protected] адреспа ямалла. Заявкăсене йышăнасси тата консультаци парса пулăшасси куллен 9.00-18.00 сехетчен 8 (352) 62-35-61 телефон тăрăх пурнăçланать.
Пултарулăх ăмăртăвĕ – хăйне майлă театр спектаклĕ, конкурс номерĕсем сцена ăстисемпе пултарулăх коллективĕсен репертуарĕпе улшăнса пырĕç. Пикесен ăмăртăвĕ пилĕк ĕçрен тăрĕ : «Паллашу карточки» (сцена культурипе артист ăсталăхне хак парасси), «Ăс-тăн конкурсĕ», «Пултарулăх конкурсĕ», «Чăваш халăх апачĕ», «Чăваш халăх тумĕсемпе паллаштарасси».
Конкурс çĕнтерÿçисене çакăн пек ятсем параççĕ: I вырăн – «Раççей чăваш пики-2024», II вырăн – «Вице – Раççей чăваш пики – 2024».
Жюри ытларах сас панă участниксем уйрăм номинаци çĕнтерÿçисем пулĕç: «Чăваш Ен тулашĕнчи чи пултаруллă пике», «Тараватлă пике», «Çивĕч ăс-тăнлă пике», «Хÿхĕм пике». Куракансем хушшинче чи нумай сас пуçтарнă хĕр «Куракансем кăмăлланă пике» ята тивĕçĕ.
Йĕркелÿ комитечĕн адресĕ: 428032, г. Чебоксары, ул. Композиторов Воробьевых, д.10, МОО «Чувашский национальный конгресс», тел.: (8352) 62-35-61.
Йĕркелÿ комитечĕ.