Бакалă районĕнче çĕнĕ поликлиника тата 6 ФАП хăпартĕç

Медицина объекчĕн пĕтĕмĕшле хакĕ 440 млн тенкĕпе танлашать. Çĕнĕ поликлиника 150 çын йышăнма пултарать, унта консультаципе диагностика блокĕ, специалистсен пÿлĕмĕсем (çав шутра хĕрарăмсен консультацийĕ) вырнаçĕç.

Алексей Касьянов палăртнă тăрăх, строительство ĕçĕсем планпа килĕшÿллĕн пыраççĕ, вĕсем 2025 çул вĕçĕнче вĕçленмелле. Шăпах çав вăхăт тĕлне асăннă районта тата ултă фельдшерпа акушер пункчĕ уçăлĕ. Паянхи кун районта пурăнакансене 41 ФАПпа пĕр тухтăр амбулаторийĕ медицина пулăшăвĕ парать.

Çавăн пекех тĕп федераллă инспектор «Буратино» ача садне çитсе курнă. Ăна хăпартма 71 млн тенкĕ тăкакланине палăртса хăвармалла. Унсăр пуçне Алексей Касьянов вырăнта пурăнакансемпе тĕл пулнă. Наци проекчĕсем мĕнле пурнăçланнине, укçа-тенкĕпе епле усă курнине тĕрĕслес ĕç малалла  тăсăлнине палăртнă.