Сывлăх поезчĕсен тухтăрĕсем 14 пациентăн онкологи чирĕн хăрушлăхне асăрханă

Кăçал вĕсем республикăри аякри районсенче 19 128 пациента йышăннă, 4 650 тĕрĕслев ирттернĕ. Çав шута - 3 032 флюорографи тата  16 113 маммографи тĕрĕслевĕсем кĕреççĕ. Çакăн çинчен регионти сывлăх сыхлав министерствинче пĕлтернĕ.

- Икçĕр çирĕм тăхăр çыннăн юнри глюкоза шайĕ, 432 çыннăн холестерин шайĕ, 832 çыннăн юн пусăмĕ пысăк пулнă. Çавăн пекех 794 çыннăн ÿт виçи ытлашши пулнине регистрациленĕ, - палăртнă сывлăх сыхлав министерствинче.

Куçса çÿрекен тухтăрсен бригади 990 чире (вĕсенчен çурри социаллă пĕлтерĕшлĕ шутланаççĕ) тупса палăртнă. Вун тăватă çынра онкологи чирĕн хăрушлăхне, 27 çынра сахăр диабетне асăрханă.