Ултавçăсенчен инкек куракансем «хăйсен ертÿçисенчен» пĕлтерÿсем илнĕ, кайран вĕсене «ФСБран» шăнкăравланă имĕш. Çапла майпа Кумертаури психиатри больницин тухтăрĕ аферистсене 1 млн тенкĕ, Учалă хулинчи 55 çулхи вĕрентекен 1,2 млн тенкĕ куçарса панă. Банкра кредит илнĕ чух укçа трактор туянма кирлĕ тесе ĕнентернĕ. Авăркас ялĕнчи 58 çулхи учительница пĕлмен çынсене шанса 3 млн тенкĕ куçарнă.
Бураево ялĕнчи пенсионеркăн хăйпе пĕрле 10 пин тенкĕ çеç пулнă пулсан та кредит илсе ултавçăсене 1,9 млн тенкĕ «парнеленĕ». Бирск хулинчи 29 çулхи повар çапла майпа - 1,З млн тенкĕ, Октябрьский хулинчи 42 çулхи усламçă 1,2 млн тенкĕ çухатнă. Нефтекамск хулинче пурăнакан тăхăр вун çичĕ çулхи кинемей «Сирĕн тăванăр çул-йĕр инкекне лекнĕ» схемăпа курьера укçа тыттарса янă. Кайран преступника тытса чарнă, вăл иккĕмĕш курс студенчĕ пулнă.
Ултавçăсен серепине лекессинчен асăрханăр! Çак тĕслĕхсем сире урок вырăнне пулччăр.