Пушара маларах систерекен приборсем 1,1 пин ытла çын пурнăçне çăлса хăварнă

Регион ертÿçи аса илтернĕ тăрăх, республика бюджет шучĕпе 15 категорине кĕрекен çынсене тÿлевсĕр приборсемпе тивĕçтерекен Раççейри пĕртен-пĕр субъект шутланать.

 «Кăçалхи çу кунĕсенчен эпир тулли пурнăçпа пурăнайманнисен, начар куракансемпе илтекенсен çурчĕсенче GSM-модульлĕ приборсем вырнаçтарма пуçларăмăр. Енчен те пушар тухсан хыпар темиçе номер тăрăх сарăлать – васкавлă службăсене, тăванĕсене. Çакă вут-çулăмран хăй тĕллĕн тухма пултарайман çынна хăтарма май пуррине пĕлтерет. Çакна пĕр тĕслĕхпе çирĕплетсе пама пулать: Благовещенск хулинче пурăнакан пĕрремĕш ушкăн инваличĕ (начар курнипе) плита çинче чейник лартса хăварнă. Вăл пĕччен пурăннă,  GSM-модульлĕ прибор унăн пурнăçне çăлса хăварнă», - тесе çырнă Радий Хабиров.   

Хальхи вăхăтра çакăн йышши приборсене Благовещенскпа Ишимбай, Çтерлĕпе Татăшлă районĕсенче вырнаçтараççĕ. Пĕтĕмĕшле вĕсенче тулли пурнăçпа пурăнайман 1 347 çын пурăнать. Вĕсене GSM-модульлĕ приборпа тивĕçтерес тесен заявка памалла. Çакна тăвас тесен 8(347) 272-00-24 телефонпа Пушарсен профилактика центрне шăнкăравламалла.