«ВАЗ-2107» автомобиль «КамАЗпа» çапăннă, çамрăк каччă вилнĕ

Пушкăртстанри Краснокамск районĕнче çăмăл автомобильпе «КамАЗ» хире-хирĕç çапăннă. Инкеклĕ лару-тăру министерствин регионти патшалăх комитечĕн пресс-служби пĕлтернĕ тăрăх, çул-йĕр пăтăрмахĕ Кивĕ Уразай ялĕнчен икĕ çухрăмра пулса иртнĕ. «ВАЗ-2107» автомобиль салонĕнче виçĕ çын пулнă.

«Çăмăл машина рулĕ умĕнчи 19 çулхи водитель вырăнтах сывлама пăрахнă. Раççейри Инкеклĕ лару-тăру министерствин ĕçченĕсем çăлавçăсен гидравлика инструменчĕпе усă курса салонран тата икĕ çамрăка, 18 тата 19 çулхисене, кăларнă. Вĕсене çийĕнчех больницăна ăсатнă. Тухтăрсем вĕсен суранĕсем питĕ йывăр пулнине çирĕплетнĕ», - пĕлтернĕ ведомствăра.

ПР Патшалăх автоинспекцин пресс-служби авари паян кăнтăрла Ташкиново – Кивĕ Уразай автоçулăн 4-мĕш çухрăмĕнче пулса иртнине çирĕплетнĕ. Малтанхи информаци тăрăх, «ВАЗ-2107» рулĕ умĕнче Томск облаçĕнчи 19 çулхи каччă пулнă, «КамАЗпа» - аллă тăваттăри арçын. Çăмăл автомобильти пассажирсем – Янаул районĕнчен.

Хальхи вăхăтра вырăнта çул-йĕр инкекĕн сăлтавĕсене уçăмлатаççĕ.

Юрий СНЕГОПАД.