Пушкăртстанра юлашки талăкра тăватă ландшафлă пушар тухнă

Республикăра иртнĕ талăкра тăватă вырăнта - Калтасă, Салават, Çтерлĕ тата Янаул районĕсенче - типнĕ курăк çунма пуçланă. Мĕнпур вут-çулăма сÿнтернĕ тесе пĕлтернĕ ПР Инкеклĕ лару-тăру патшалăх комитечĕ.

Çулталăк пуçланнăранпа пурĕ 55 гектар лаптăк çинче ултă вăрман пушарĕн вут-çулăмĕ алхаснă. Унсăр пуçне 219 гектар çинче 144 вырăнта типĕ ÿсен-тăран çуннине шута илнĕ. Сăмах май, нумаях пулмасть ландшавлă пушар Пелепей тăрăхĕнче пулса иртнĕ, «хĕрлĕ автан» 10 гектар çинчи çут çанталăк пурлăхне тĕп тунă.

Пушкăртстанри Инкеклĕ лару-тăру патшалăх комитечĕ çут çанталăка канма е урăх ĕçпе тухсан, вут-кăварпа асăрханнуллă пулма тата хăрушсăрлăх нормисене пăхăнма ыйтать.

Юрий СНЕГОПАД.