Дуван районĕнчи çул çинче пысăк инкек пулса иртнĕ

ПР Патшалăх автоинспекцийĕ пĕлтернĕ тăрăх, пăтăрмах каçхи 19.00 сехетсенче Крапачово – Мясегутово – Ачит автоçулăн 80-мĕш çухрăмĕнче пулнă. Хĕрĕх пĕр çулхи васкавлă пулăшу автомобилĕн водителĕ «Газельпе» хăй умĕнче тăракан «Лада Веста» (вăл светофорăн хĕрлĕ çутти çуннипе чарăннă пулнă) тата çăк турттаракан «Мерседес» çине пырса кĕнĕ.

Аваринче «Газель» çинчи виçĕ пассажир вырăнтах вилнĕ.  Вĕсен шутĕнче  икĕ медицина ĕçченĕ тата водителĕн 20 çулхи хĕрĕ пулнă. Водителе йышлă та йывăр сурансемпе больницăна ăсатнă.

Лару-тăрăва сывлăх сыхлав министре хăй тĕрĕслесе тăрать. Вилнĕ медицина ĕçченĕсен çемйисене пулăшу парĕç. Инкек мĕн сăлтава пула пулса иртнине компентентлă органсем уçăмлатаççĕ.

Юрий СНЕГОПАД.