Вилнĕ çынсен даннăйĕсене вăрлакан мошенниксене тытса чарнă

Усал шухăшлă çынсем  Раççейре пурăнакансен «Госуслуги» порталти аккаунчĕсене çĕмĕрнĕ, вилнисен учет çырнисемпе усă курма та именсе тăман. Ют çынсен паспорт даннăйĕсемпе усăлланса SIM-картăсем уçнă. Вĕсенчен вара пĕтĕм çĕршывĕпе спам-шăнкăравсем тунă. Мошенниксем тĕрлĕ регионти çынсене тĕрлĕ сăлтавпа шăнкăравласа ултав мелĕсемпе усă курса укçа ыйтса илнĕ.

Преступлă ушкăн хăй ĕçĕ валли Ĕпхÿпе Волгоград хулисенче тăватă офис тара илнĕ. Асăннă колл-центрсенче çĕнĕ номерсене регистрациленĕ те  регионсене ăсатма хатĕрленĕ.

Полицейскисем операци вăхăтĕнче 22 çынна тытса чарнă. Вĕсен шутĕнче пуçлăхсем, вĕсен çумĕсем, регионти координаторсем, SIM-картăсем  уçакан операторсем, курьерсем. Халĕ вĕсен тепĕр çыннине шыраççĕ.

Тытса чарнисене хирĕç компьютер информаципе, SIM-картăсемпе  саккунсăр майпа усă курнăшăн уголовлă ĕç пуçарнă. Вун пĕр çынна преступниксен ушкăнне йĕркеленĕшĕн айăплаççĕ.

Шырав вăхăтĕнче асăннă ушкăнăн ноутбукĕсене, телефонĕсене, тĕрлĕ операторсен 4,5 пин ытла SIM-карттине, пысăк укçа-тенкĕ тата следстви валли пĕлтерĕшлĕ çырмалли кĕнекесене туртса илнĕ.

Тĕпчев малалла тăсăлать, оперативниксем преступлениллĕ ĕçĕн вак-тĕвекĕсене тĕпчеççĕ.