Черетлĕ пысăк гуманитари пулăшăвĕ ăсатнă

Гуманитари пулăшăвĕ çитме йывăр районсенче усă курмалли кустăрмаллă техникăран, автобуссенчен, мотоциклсенчен, запас пайсенчен, пĕрене-хăмаран тата вутран, генераторсемпе инструментсенчен, оргтехникăсемпе эмелсенчен тата апат-çимĕçрен тăнă. Унсăр пуçне салтаксене квадрокоптерсемпе, БПЛАпа, телевизорсемпе, радиостанцисемпе тата кирлĕ ятарлă техникăпа тивĕçтернĕ. Гуманитари пулăшăвне республикăри муниципалитетсемпе обществăлла организацисем, ырă кăмăллă çынсем пухнă. Пысăк пĕлтерĕшлĕ ĕçе Пушкăртстан правительствин вице-премьерĕ Ирек Сагитов илсе пынă.

Çула тухас умĕн водительсемпе пулăшăва йĕркеллĕ илсе çитерессишĕн яваплă çынсем тепĕр хут инструкци иртнĕ. Автоколонна «Башсельхозтехника» предприяти территоринчен хускалса кайнă. Вĕсемпе пĕрле Пушкăртстанри Инкеклĕ лару-тăру патшалăх комитечĕн ĕçченĕсем те çула тухнă. Экипаж командирĕ, пушарсене хирĕç кĕрешекен республика службин ертÿçин çумĕ Рамиль Давидов, кашнинех ятран тĕрĕсленĕ хыççăн çула тухма хатĕр пулнине раципе пĕлтернĕ. Çакăн хыççăн автопоезд вырăнтан хускалнă.