Салтаксене кам мĕнпе пултарать, çавăнпа пулăшать

Чăн сăмахăн суи çук.  Акă, Пелепей районĕнчи Слакпуç ялĕнче пурăнакансем салтаксене кирлĕ япаласем туянма 30 пин тенкĕ яхăн пухнă. Унсăр пуçне Ольга Андреева сĕннипе апат пĕçерме 100 яхăн банка салат хатĕрленĕ. Çак ĕçе Л.В. Гудкова, О.А. Егорова, О.А. Андреева, В.П. Павлова, В.В. Маркелова, И.В. Кузьмина, Р.В. Андреева, Г.Г. Потапова, Л.А. Тимофеева, А.А. Павлова, О.Г. Маркелова тата вырăнти шкулта ăс пухакан ачасем хастар хутшăннă.

Слакпуç ял Канаш администрацийĕн пуçлăхĕн тивĕçне пурнăçлакан Ольга Егорова вырăнти усламçăсене Анатолий Степановичпа Ирина Юрьевна Яковлевсене «Сказка» кафе пÿлĕмĕпе усă курма май панăшăн чунтан тав тунă. Ольга Анатольевна кирек мĕнле йывăрлăхра та вăйсене пĕрлештерсен СВО-на хутшăнакан паттăрсене пулăшма май пуррине палăртнă.

***

Ермеккей районĕнчи Суккул ялĕнчи «Хозяюшки» тата «Паучки» ушкăнсем тăтăшах  гуманитари пулăшăвĕпе çыхăннă тĕрлĕ акцисене хутшăнаççĕ. Çак кунсенче «Салтак валли кил салми» акци вăхăтĕнче Г.С. Маннанова чуста çăрнă пулсан, Л.Н. Аднагулова, Н.Н.Тарасова, Г.В. Аднагулова, Е.Н. Кириллова, Х.А. Кашапова хатĕр чустана сарнă. А.Р. Минихановапа Р.М. Хакимова тата Д.И. Аюпова салтаксене чăтăмлăхпа сывлăх сунса кил салми каснă. Типĕтнĕ салмана савăтсем ăшне вырнаçтарса ятарлă çар операци пыракан зонăна çак кунсенче ăсатĕç.

***

Федоровка районĕнчи Ашкатар ялĕнчи «Пĕрле эпир вăй!» волонтерсен ушкăнĕ те алă усса лармасть, гуманитари пулăшăвĕ пуçтарса хатĕрлес ĕçе хастар хутшăнать. Октябрь уйăхĕн 17-мĕшĕнче вырăнти волонтерсем яла отпуска таврăннă салтак урлă 5 маскировка сечĕ, 2 дрона хирĕç кĕрешмелли сеть-штор, 10 тĕрке нÿрĕ салфетка, 6 мăшăр ăшă йышши нуски тата 10 газ баллонĕ ăсатнă. Çапла, вăхăтра кÿнĕ чи пĕчĕк пулăшу кая юлса тунă чи пысăк пулăшуран та хаклăрах.