Ĕпхÿре Пушкăрт патшалăх университечĕн ректорĕ пулнă Мухамат Харрасова юлашки çула ăсатнă

Паян, март уйăхĕн 10-мĕшĕнче, республикăн тĕп хулинче паллă ăсчахпа, общество деятелĕпе, Пушкăрт патшалăх университечĕн ректорĕ пулнă Мухамат Харрасовпа сывпуллашнă. Ăна юлашки çула ăсатма йĕркеленĕ хурлăхлă церемоние ПР Пуçлăхĕ Радий Хабиров, Пушкăртстан парламенчĕн председателĕ Константин Толкачев хутшăннă. Ăсчахăн чĕри 76 çул тултараймсăр тапма чарăннă.

Мухамет Хадисович Харрасов физика енĕпе ĕçлекен ăсчах, ПР Наукăсен академийĕн пайташ-корреспонденчĕ (2002 ), физикăпа математикăсен докторĕ (1995 ), профессор (1996), 2000-2010 çулсенче Пушкăрт патшалăх университечĕн ректорĕ пулнă. Вăл - РФ тава тивĕçлĕ наука ĕçченĕ (2008), ПР тава тивĕçлĕ наука ĕçченĕ (1998), Раççейри Естествăлла наукăсен академийĕн академикĕ (1998), РФ профессиллĕ аслă вĕрентÿн хисеплĕ ĕçченĕ (2002), РФ Вĕрентÿ министерствин отличникĕ (2003).

Паллă та сумлă ăсчаха тăван ялĕн масарĕ çинче, Белорецк районĕнчи Сермен ялĕнче, пытарнă.

Юрий СНЕГОПАД.