Слакпуç ялĕ паттăр салтакпа сывпуллашрĕ

«Вăрçă вилĕмсĕр пулмасть» теççĕ халăхра. Кунпа килĕшмелле. Икĕ хире-хирĕç вăй çапăçнă чухне вилĕмсĕр çĕнтерÿ пулас çук. Çĕнтерĕве вара эпир пурте кĕтетпĕр. Пирĕн паттăр та ăна шаннă. Сăмах кунта Пелепей районĕнчи Слакпуç ялĕнче çуралса ÿснĕ, 2022 çулхи сентябрь уйăхĕнчен пуçласа кăçалхи августăн 30-мĕшĕнче ятарлă çар операцинче пулнă Владимир Ермолаев рядовой пирки пырать.

Сентябрь уйăхĕн 12-мĕшĕнче 30 çулти чăваш арне çывăх çыннисемпе ял-йыш, тус-пĕлĕшĕсем юлашки çула ăсатрĕç. Çак хурлăхлă сăлтава пула Слакпуç ялĕнчи Çĕнтерÿ мемориалĕ умĕнче митинг иртрĕ. Ăна кĕске сăмах каласа Пелепей районĕнчи ветерансен канашĕн председателĕ Александр Буйлов уçрĕ. Çавăн пекех сывпуллашу церемонине Пелепей район администраци пуçлăхĕн пĕрремĕш çумĕ Ихсан Бадретдинов, «Боевое братство» Пĕтĕм Раççейри ветерансен организацийĕн Пелепейри уйрăмĕн председателĕ Рим Багманов, Слакпуç ял хутлăх администрацин пуçлăхĕн тивĕçĕсене пурнăçлакан Ольга Егорова, Пелепей районĕнчи чăвашсен наципе культура автономин ертÿçи Владимир Яковлев хутшăнчĕç, пухăннă халăх умĕнче сăмах каларĕç, Владимир Ермолаев тупăкĕ умĕнче пуç тайрĕç.
Митинг хыççăн çул ял масарĕ еннелле выртрĕ. Паттăр салтакăн ÿчĕ çакăнта канлĕх тупрĕ.
Юрий СНЕГОПАД.
Пелепей районĕ, Слакпуç ялĕ.