Пĕтĕм тĕнчери бизнес эрнине Беларуси делагацийĕ килсе çитнĕ

Мероприяти республикăн тĕп хулинче декабрĕн 3-6-мĕшĕсенче иртĕ. Пирĕн региона чи малтан Беларусь Республикин делегацийĕ вĕçсе килнĕ. Ăна çĕршыв экономикин министрĕ Юрий Чеботарь ертсе пырать. Белорусси делегацийĕн йышне 20 ытла бизнес представителĕ кĕнĕ. Мероприяти шайĕнче вĕсем хăйсен ĕçтешĕсемпе тата власть органĕсен представителĕсемпе ĕçлĕ проектсене, аталану планĕсене тата малашне те тачă çыхăнса ĕçлессине сÿтсе явĕç.

Кăçал Беларусипе Пушкăртстан официаллă майпа тачă çыхăнура ĕçлеме пуçланăранпа 25 çул çитнĕ. Çак тапхăрта юлашки 5 çул хушшинче хастар та тухăçлă ĕçленĕ – хутшăнусем, официаллă тата бизнес делегацийĕсем пĕр-пĕрин патне кайса çÿренĕ. Кăçал Пушкăртстанпа Брест облаçĕ хушшинче Пушкăртстанпа Беларусин административлă пĕрлĕхĕсемпе тăванлашасси тата предприятисемпе организацисем тачă çыхăнса ĕçлесси çинчен килĕшĕве алă пуснă.

Пĕтĕм тĕнчери бизнес эрни темиçе тематикăллă кунран тăрать. Декабрĕн 3-мĕшĕнче Предприниматель кунĕ иртет. Декабрĕн 4-мĕшĕнче «Çулталăк юрисчĕ» Пĕтĕм Раççейри юридици форумне йĕркелĕç. Пĕтĕм тĕнчери VI Ялта экономика форумĕ хăйĕн хăнисене декабрĕн 5-мĕшĕнче пухĕ. Декабрĕн 6-мĕшне вара инвестицисемпе пĕтĕм тĕнчери хутшăнусене халаллĕç.