Ырă ячĕ асра юлĕ

Хурлăхлă митинга район администрацийĕн пуçлăхĕн тивĕçĕсене пурнăçлакан Равиль Арсланов, Пелепей тата Ермеккей районĕсен çар комиссариачĕн представителĕ Евгений Ильсов, районти ветерансен Канашĕн председателĕ Исмагил Сабиров, Эрехĕрри ял хутлăхĕн пуçлăхĕ Ольга Зарянова, ытти ял хутлăхĕсен пуçлăхĕсем, пĕр ял çыннисем тата паттăрăн çывăх çыннисемпе тăванĕсем хутшăннă. Вĕсем пурте Михаил Васильевăн амăшĕпе, мăшăрĕпе тата ачисемпе тарăннăн хурланни çинчен пĕлтернĕ. Сăмах калакансем Михаил Владимирович хăйĕн пурнăçне пирĕн Тăван çĕршывăн ирĕклĕхĕпе никама пăхăнманлăхĕшĕн панине палăртнă. Чăваш арĕ чăн-чăн герой пек Тăван çĕршыва хÿтĕлекенсен ретне тăнă, вăл ĕмĕрлĕхех пирĕн асра тăрса юлĕ. 

Михаил Васильев 1983 çулхи сентябрь уйăхĕн 19-мĕшĕнче Уйăлка ялĕнче çуралнă. Тăхăр класс пĕтерсен Пелепейри механизаципе электрификаци колледжĕн Ермеккейĕнчи филиалне автомеханика вĕренме кĕнĕ. Алла диплом илсен 2001 çулта РФ Хĕç-пăшаллă вăйĕсен ретне тăнă. Михаил Васильев салтак тивĕçне Камчаткăра, Çарпа тинĕс флотĕнче, пурнăçланă. 

Уйăлка арĕ Екатерина Ивановна мăшăрĕпе виçĕ ачашăн атте-анне пулса тăнă. Çемье пуçĕ вахта мелĕпе Хантă Манси округĕнче ĕçленĕ, пĕлÿллĕ специалист, ĕçне лайăх пĕлекен çын пулнă. Кăçалхи июль уйăхĕнче Михаил РФ Оборона министерствипе контракт алă пуснă. Ятарлă çар операцийĕн задачисене пурнăçланă май август уйăхĕнче паттăрсен вилĕмĕпе вилнĕ. Паттăра ял масарĕ çинче çар чысĕпе пытарнă. Унăн ячĕ халăхăн асĕнче ĕмĕрлĕхех асра юлĕ.

Ермеккей районĕ, Уйăлка ялĕ.