Ĕпхÿри ветеран 100 çулхи юбилейне палăртнă

- Герман Сергеевич  январь уйăхĕн 1-мĕшĕнче 100 çулхи юбилейне палăртнă. Ăна ĕмĕр тăршшĕпе нумай шурăпа хура витĕр иртме тÿр килнĕ.  Пирĕн ветеранăн пурнăçĕ хальхи тата пулас ăрушăн тĕслĕх вырăнне. Асăннă ÿсĕмри çынсен хул пуççийĕсем çине чылай йывăрлăх выртнă, нумай хĕнлĕх тÿсме пÿрнĕ. Анчах вĕсем пурне те çĕнтернĕ! -  çырнă социаллă сетьсенче Киров районĕн пуçлăхĕ Илвир Нурдавлятов.

Герман Сергеевич ĕçлĕ пурнăçне Ĕпхÿри мотор тăвакан производство пĕрлĕхĕнче (УМПО) пуçланă. Çав заводра ĕçленĕ чух Тăван çĕршывăн Аслă вăрçи пуçланнă та. Вăрçăн пĕрремĕш çулĕсенче, ыттисем пекех, хăйне фронта яма ыйтнă.  Анчах та завод рабочийĕсене бронь пулнă май ăна яман. 1944 çулта çеç фронта лекме пултарнă. Кенигсберг хули çывăхĕнчен тăшманпа çапăçнă, çар медалĕсене илме тивĕçнĕ.

-  Пĕтĕм чун-чĕререн Тăван çĕршыва тăшманран хÿтĕленĕ, кайран вăрçăпа арканнă ял-хуласене, çĕршыв хуçалăхĕсемпе предприятисене ура çине тăратма пулăшнă çĕнтерÿ ăрăвне тав тăватăп. Вăл ÿсĕмри çынсем йывăр вăхăтра ĕçлесе пурăннă, ачисемпе мăнукĕсене Тăван çĕршыва юратма вĕрентесе ÿстернĕ. Тайма пуç сире! - палăртна район пуçлăхĕ.

2016 çулхи çулла Тăван çĕршывăн Аслă вăрçин ветеранĕ Ĕпхÿри Киров районĕн çынни пулса тăнă. Ветерансене пурăнмалли вырăнпа тивĕçтермелли социаллă пулăшупа усă курса икĕ пÿлĕмлĕ хăтлă хваттер туяннă.