Хавхалану кашни çипрех

Пĕлетĕр-и, ял таврашĕнче пысăк тухăç пуçтарса илесси - пĕлтерĕшлĕ ĕç. Анчах унта çивĕч ăслă, пуян опытлă та ылтăн алăллă çынсем пурăнни тата та пĕлтерĕшлĕрех.

Ĕпхÿ районĕнчи Хăмăшлă ялĕнче çакăн пек çынсем çук мар. Вĕсенчен пĕри – чăваш эрешĕсене тĕрлеме пĕлекен Анна Александрова. Анна Михайловна 40 çул ытла чăваш тĕрĕ-эрешĕсене сыхласа хăварма, чĕртсе тăратассишĕн тăрăшать. Унăн ылтăн аллисем тĕлĕнмелле илемлĕ çи-пуçсем, вак шăрçаран тĕрлĕ япаласем ăсталаççĕ. Шăпах вĕсенче халăх чунĕ палăрать, упранать.

Хăмăшлă ялĕнчи культура çуртĕнче иртнĕ тĕлпулура Анна Александрова хăйĕн ĕçĕсемпе паллаштарнă май пухăннисене чăваш халăх йăли-йĕркисен тĕнчине илсе кайнă. Ал ĕç ăсти 40 çул каялла чăваш туйне мĕнле ирттернине каласа панă, наци апачĕсемпе, вăййисемпе, каччăпа хĕрĕн тумĕсен пайĕсемпе паллаштарнă. Çакă хамăр йăх-тымара юратма тата хисеплеме вĕрентекен чăн-чăн чĕрĕ урока çаврăннă.

Пĕр сăмахпа каласан, калаçу ал ĕçĕ пирки мар, пурнăç çинчен пынă. Çулсем иртсен те тĕрĕ çиппи асламăшпе мăнукне, ялпа пысăк тĕнчене çыхăнтарать. Çапла Анна Михайловна чăн-чăн илемпе вăй пирĕн çумрах, алăсемпе чĕресенче, пулнине ăнлантарса панă.

Халĕ пирĕн MАХ мессенджерта официаллă канал пур! Унта web.max.ru/-687399910... каçăпа куçма пулать.

Ирида НОВИКОВА.
Ĕпхÿ районĕ, Хăмăшлă ялĕ.