Сакăр пин ытла çамрăк ача çуллахи каникул вăхăтне ĕç тупнă

Ачасем вун тăватă çултан пуçласа вĕренÿрен пушă вăхăтра, çавăн пекех пĕтĕмĕшле шкул пĕлĕвĕ илнĕ хыççăн ĕçлеме пултараççĕ. Анчах  16 çулччен ашшĕ е амăшĕ тата опека органĕсем ирĕк парсан çеç. Заявление тÿрремĕн опека органĕсене тăратма е Госуслуги портал урлă онлайн мелĕпе яма пулать.

Вун ултă çултан пуçласа РФ Ĕç кодексĕпе килĕшÿллĕн ачасем хăйсем тĕллĕн ĕç килĕшĕвне алă пусма пултараççĕ.

Çул çитмен ачасене ĕçе вырнаçтарнă вăхăтра çак правилăна пăхăнмалла: вĕсем сывлăха сиен кÿрекен тата хăрушă условисенче ĕçлеме пултараймаççĕ. Ĕçпе тивĕçтерекен ачасене ĕçрен ытла (сверхурочно), канмалли тата уяв кунĕсенче, çĕрле ĕçлеттереймест, командировкăсене яраймасть. Асăннă чару мерисем пултарулăхпа тата спортпа çыхăннă çынсене пырса тивмеççĕ.