Волонтерсем ятарлă çар операцине хутшăнакансен çемйисене мĕнле пулăшаççĕ?

Кармаскалă районĕнчи Тинĕскÿл шкулĕнчи Людмила Павлова вĕрентекен ертсе пыракан волонтер ушкăнĕ салтаксене тĕрлĕ енлĕ хавхалантарма тăрăшать: вĕренекенсем çырусем çыраççĕ, сăн ÿкерчĕксем ÿкереççĕ, пысăк мар парнесем хатĕрлеççĕ. Унсăр пуçне вĕсем паттăрсен çемйисене хуçалăхра пулăшма тăрăшаççĕ. Акă, ĕнер, сентябрь уйăхĕн 5-мĕшĕнче, ачасен пĕр ушкăнĕ пулăшу парас тĕллевпе Тинĕскÿлте пурăнакан Трофимовсен çемийне килсе çитнĕ. Арçын ачасемпе хĕр ачасем хаваспах ĕçе пикеннĕ: тырă витрепе йăтнă, пахча-çимĕç авăрĕсене пуçтарса прицеп çине тиенĕ. Волонтерсем палăртнă ĕçе кĕске вăхăт хушшинче пурнăçланă.

Аслисем ачасене ырă ĕçпе пулăшнăн чунтан тав тунă. Волонтерсем паттăрсен вилĕмĕпе пуç хунă Андрей Трофимовăн ашшĕпе амăшне савăнăç кÿме пултарнăшăн хĕпĕртенĕ. Зинаида Поликарповна ывăлĕ çинчен каласа панă, унăн медалĕсемпе орденне кăтартнă. Çакăн хыççăн вăл вĕренекесене пылак кучченеçпе сăйласа ăсатнă.    

Кармаскалă районĕ, Тинĕскÿл ялĕ.