Республикăра 14-35 çулхи 1,1 млн çамрăк çын пурăнать

Пушкăртстан статистики Çамрăксен кунĕ тĕлне яш çынсемпе çыхăннă цифрăсене пичетлесе кăларнă.

2021 çулăн пуçламăшĕ тĕлне республикăра 14-35 çулхи 1 107,6 пин çамрăк çын пурăнать. Вăл Пушкăрстанра пурăнакансенчен 27,6% шутланать, вĕсенчен 50,5% - арçынсем, 49,5% - хĕрарăмсем.

Хуласенче 735,9 пин çын (пĕтĕм хула çыннисенчен 29,3%), ялсенче 371,7 пин çамрăк (пĕтĕмĕшле ялта пурăнакан çынсенчен 24,7%) кун кунлаççĕ.

Хуласенче 14-35 ÿсĕмри кашни 1000 арçынна  1071 хĕрарăм килет, ялсенче  - 810 хĕрарăм çеç.

Пушкăртстанра çамрăксене ĕçпе тивĕçтермелли шай пысăк . 2020 çулхи тĕпчевсем тăрăх 15-34 çулхи  60,4% çамрăк экономика сферинче тăрăшаççĕ. Асăннă ÿсĕмĕн ĕçсĕрлĕх шайĕ иртнĕ çулта 7,5% çитнĕ.