Пур хыпар та
Чăвашлăх
10 Сентябрӗн 2021, 17:23

Пушкăртстанра Наци тумĕсен кунне уявлаççĕ

Паян Пушкăртстанра чи çутă та илемлĕ уявсенчен пĕрне, Наци тумĕсен кунне, паллă тăваççĕ. Уяв 2020 çултанпа  регион ертÿçин Радий Хабировăн указĕпе   килĕшÿллĕн иртет. Ăна çулталăкне икĕ хутчен паллă тăваççĕ: апрель уйăхĕн виççĕмĕш эрне кунĕнче тата сентябрь уйăхĕн иккĕмĕш эрне кунĕнче.

Пушкăртстанра Наци тумĕсен кунне уявлаççĕ

Уяв республикăра пурăнакан халăхсен йăли-йĕрки, историпе культури патне таврăнма май парать. Вăл наци палли пекех, авалхи культурăпа ăс-тăн еткерлĕхне упрама пулăшать. Çавăнпа та уява республикăри пур хуласемпе районсенче  те хаваспах хутшăнаççĕ. Ĕпхÿре те асăннă уява халалласа анлă программа хатĕрленĕ. Наци тумĕн кунне  уявлама Пушкăртстанри историпе культура центрĕсем те хастар хутшăнаççĕ. Республикăн тĕрлĕ кĕтесĕнче наци костюмĕсен куравĕсем, çак тематикăна халалланă флешмобсем, хĕрарăмсен эрешĕсене, кăкăр умне çакмаллисене хатĕрлеме, кĕпе касса çĕлеме, тĕрлеме   вĕрентекен мастер-классем  тата ыт. те иртеççĕ. Тĕрлĕ йышши культура, наци хăйнеевĕрлĕхĕ – çакна пурне те Наци тумĕн кунĕнче курма пулать.

Наци тумĕн кунне вĕрентÿ учрежденийĕсенче те анлăн паллă тăваççĕ. Шкулсенче республикăри халăхсен тумĕсене халалланă пĕрлĕхлĕ уроксем, тĕрлĕ флешмобсем, конкурссемпе презентацисем иртеççĕ. Уроксенче халăхсен культурипе кулленхи пурнăçĕ çинчен каласа параççĕ, халăх ташшисен видеокуравĕсене пăхаççĕ, халăх инструменчĕсемпе калакан кĕвĕсене итлеççĕ.

Вĕрентÿ учрежденийĕсенче кун йышши мероприятисем ирттерни  ачасене тăван халăх культурипе, йăли-йĕркипе кăсăклантарма пулăшать, тăван тавралăхпа мăнаçланас туйăмсене аталантарать, халăх ăстисен ĕçне хисеплеме вĕрентет.

Надежда РОДИОНОВА.

Автор:Надежда Родионова