Танзиля Шарипова «Ача амăшĕ геройиня» ята тивĕçнĕ

ПР Ĕç министерствинче пĕлтернĕ тăрăх, Танзиля Шарипова мăшăрĕпе Октябрьски хулинче çирĕп çемье чăмăртама, хăйсен 12 ачине ура çине тăратма, тивĕçлĕ воспитанипе пĕлÿ пама пултарнă. Ачисем пурте професси пĕлĕвĕ илнĕ, Пушкăртстанра тата çĕршывăн ытти регионĕсенче ĕçлесе пурăнаççĕ. Кашнийĕ çемье çавăрнă. Паянхи кун Танзиля Шакуровнана 19 мăнук пурри савăнтарать. Халĕ утмăл çичĕ çулхи кинемей Туймазă районĕнчи Имангулово ялĕнче пурăнать.

 - Танзиля Шакуровна тата унăн çемйи поселокра иртекен обществăлла мероприятисене хастар хутшăнаççĕ, йывăр лару-тăрăва лекнĕ çынсене пулăшу параççĕ, ял çыннисем кинемее хисеплеççĕ, сума сăваççĕ,  - каласа панă муниципалитетра.

Танзиля Шарипована Ача амăшĕн I тата II степень медалĕсемпе, «Ача амăшĕн мухтавĕ» I тата II степень орденĕсемпе чысланă. Халĕ вара нумай ачаллă анне «Ача амăшĕ геройиня» сумлă ята тивĕçнĕ. Ятпа пĕрле ылтăн орден, çавăн пекех 1 млн тенкĕ преми параççĕ.

 - Анне ролĕ çыншăн чи пĕлтерĕшли шутланать. Унтан эпир мĕн пуррине вĕренетпĕр. Кунта чи лайăх çемьерен тата 12 лайăх çемье йĕркеленнĕ. Вĕсем хăйсен ачисене обществăшăн пĕлтерĕшлĕ хаклăхсене тĕпе хурса ÿстерĕç,  - тенĕ ПР çемье, ĕç тата социаллă хÿтлĕх министрĕ Ленара Иванова.