Юрий Леонтьев черетлĕ наградăна тивĕçнĕ

Форум лăпка та ăшă, ĕçлĕ лару-тăрура иртнĕ. Унăн ĕçне Кумертаури авиаци производство предприятийĕн директорĕ, Пушкăртстан Республикин Патшалăх Пухăвĕн депутачĕ Ольга Плохова хайĕн ашшĕ-амăшĕпе хутшăннă. Тĕрлĕ чатсенче асăннă мероприяти пĕлтерĕшĕ пысăк пулнине палăртнă. Çакна аяларах илсе кăтартнă йĕркесем те çирĕплетеççĕ: «Чун-чĕре хушнипе çакăн пек анлă йĕркелнĕ пухушăн пуçаруçăсене тав тумалла. Турă упратăр вĕсене»,- тенĕ.

Форум вăхăтĕнчи пĕр кăмăллă самант çинче те чарăнса тăмалла. Авăркас районĕнчи Чăваш Хурамал ялĕнчи В.В.Николаев ячĕллĕ шкулти музей ертÿçине, тава тивĕçлĕ вĕрентекене Юрий Леонтьева Вырăс православи чиркĕвĕн Серафим Саровский медаль-орденне парса чысланă. Çак наградăна Юрий Харитонович обществăра йăла-йĕрке хаклăхĕсене упраса хăварас ĕçре тунă çитĕнÿсемшĕн тата 65 çул тултарнă ятпа тивĕçнĕ. Нумаях пулмасть вăл Раççей шайĕнче йĕркеленĕ «Вĕрентекенĕн кăмăл-сипет паттăрлăхĕшĕн» конкурсра Гран-при çĕнсе илнĕччĕ.

Саламлатпăр! Малашне тата та çитĕнÿсем тумалла пултăр.

Юрий СНЕГОПАД.