Ывăлĕсем куççульне шăлакан амăшне ыталанă

Чаплă лару-тăрура иртекен каç Раççей Федерацийĕн Президенчĕн Владимир Путинăн видеосаламĕнчен пуçланнă. Вăл ветерансене, Хĕç-пăшаллă вăйсен уйрăм йышне тата гражданла ĕçченĕсене, çар тивĕçне пурнăçланисене уяв ячĕпе саламланă.
Тĕлпулу ырă та ăшă сăмахсемсĕр, парнесемсĕр иртмен. Мероприятие ертсе пыракансем Пушкăртстан Республикинчи Давлекан районĕнчи Канчăлав ялĕнчи нумай ачаллă Наталия Валерьевна Иванова çинче чарăнса тăнă. Чăваш хĕрарăмĕ ятарлă çар операцийĕнчен тăватă ывăлĕ таврăнасса чăтăмсăррăн кĕтнине каласа панă. Паттăрсенчен виççĕшĕ СВО пуçланнă пĕрремĕш кунранах Тăван çĕршыва хÿтĕлеме тухса кайнă, тăваттăмĕш ывăлĕ иртнĕ çулхине РФ Оборона министерствипе контракт алă пуснă. Пĕртăвансенчен пĕри разведчик пулса çар тивĕçне пурнăçлать, тепри радиоэлектронлă кĕрешÿ батальонĕнче службăра тăрать тата иккĕшĕ юсав подразделенийĕсенче командир пулса çапăçаççĕ. Паттăр та хăюллă арсем, пиччĕшсем Суворов, «Çапăçура палăрнăшăн», «Çапăçура паттăрлăх кăтартнăшăн» медальсене, «Харсăрлăх» кăкăр çине çакмалли палла тивĕçнĕ. Амăшĕ, вĕсемшĕн питĕ пăшăрханать пулин те, ывăлĕсемпе чăннипех мăнаçланма пултарать. Пилĕк ача амăшне чăн-чăн паттăрсем çитĕнтернĕшĕн, Тăван çĕршывшăн тивĕçлĕ ывăлсем ÿстернĕшĕн тата тĕрĕс воспитани панăшăн «Ача амăшĕн мухтавĕ» медальпе наградăланă.
Героиня-аннене Раççей Çарĕн Тĕп академи театрĕнче иртекен концерта сума суса йыхравланă. Ăна залра пысăк парне кĕтнĕ – Анатолий, Сергей, Николай тата Дмитрий ывăлĕсем куççульне шăлакан амăшне ыталанă, чечек çыххи парнеленĕ.
Наталия Валерьевнана тата унăн çемйине халалланă материала хаçатăн çитес номерĕнче вуласа пĕлме пулĕ.

Ирида Матниязова.