«Ĕпхÿ хулин хисеплĕ гражданинĕ» ята панă

Николай Александрович 1923 çулхи январь уйăхĕн 4-мĕшĕнче Пушкăрт АССрĕн Шаран районĕнчи Паскай (Базгиево) ялĕнче çуралнă. 1938 çулта вырăнти çичĕ класлă, Шаран районĕнчи вăтам шкулсенчен вĕренсе тухнă хыççăн Чапаев ячĕллĕ колхозра счетовод, Паскай ял Канашĕн секретарĕ пулса ĕçленĕ. 1943 çулта Николай Александровича мобилизаципе вăрçа илсе кайнă. Вăл Украинăна, Молдавине, Румыние, Венгрие, Чехословакине фашистсенчен ирĕке кăларас çапăçусене хутшăннă. Çĕнтерÿ кунне Прага çывăхĕнче кĕтсе илнĕ. 1947 çулхи март уйăхĕнче тăван ялне таврăнсан ял Канаш секретарĕн должноçне малалла илсе пынă. Унтан вырăнти шкулта истори учителĕ, шкул директорĕ пулса тăрăшнă. 1950 çулта ăна Шаран район Канашĕн депутатне суйланă хыççăн Шаран райĕçтăвкомĕн çутĕç уйрăмĕн ертÿçи, 1951-1953 çулсенче «Ленин çулĕшĕн» («За Ленинский путь») хаçат редакторĕ пулса ĕçленĕ. 1953 çулта учитель ĕçне таврăннă, шкул директорĕ, завуч ĕçĕсене тивĕçлĕ канăва тухиччен пурнăçланă. 1987 çултанпа Ĕпхÿ хулинче пурăнать.
Хисеплĕ Николай Александровича «Ĕпхÿ хулин хисеплĕ гражданинĕ» ята тивĕçнĕшĕн саламласа çирĕп сывлăх, кăмăл çирĕплĕхĕ, вăрăм ĕмĕр, таврапĕлÿ ĕçĕнче ăнăçусем сунатпăр.
Пушкăртстанри чăваш наципе культура автономийĕ.