Вăл çирĕплетнĕ тăрăх, Шуратăл юхан шывĕн бассейнĕнче шыв тата юр запасĕ ытти çулхисемпе танлаштарсан 6-27% нумайрах. Çавна пула Шуратăлти шыв шайĕ вăтам кăтартуран 40-70 сантиметр çÿлерех хăпарас хăрушлăх пур. Шуратăл тата Ĕпхÿ юхан шывĕсен юхăмĕн вăтам тата аял пайĕсенче шыв шайĕ йĕркеллех пулмалла. Ĕпхÿ çывăхĕнчи Шуратăлти шыв шайĕ 670-770 сантиметра çитмелле (2023 çулта 302 см пулнă). Çав вăхăтрах Белорецк, Çтерлĕ тата Ĕпхÿ хулисен çывăхĕнчи айлăмрах вырăнсенче кил-çуртсем шыв айне пулма пултараççĕ.
Павловка тата Нижнекамск водохранилищисем шывпа туласси ытти çулсенчи вăтам кăтартупа тÿр килмелле. Урал леш енчи юхан шывсенче апрель уйăхĕн 9-14-мĕшĕсенче юр-пăртан ирĕлсе шыв юхма пуçлĕ, çакă палăртнинчен 3-5 кун маларах пулать. Сакмар тата Пысăк Ик юхан шывĕсенче те шыв шайĕ 0,5-1 метр ытларах хăпармалла. Тĕплĕнрех прогноз март уйăхĕн 25-мĕшĕнче паллă пулĕ.
Юрий СНЕГОПАД.