Çут çанталăк пушарĕсен шучĕ 25 çитнĕ

ПР Инкеклĕ лару-тăру министерстви пĕлтернĕ тăрăх, талăк хушшинче Абзелил, Ĕпхÿ, Эльшей районĕсенче, Агидельпе Кумертау хулисенче çичĕ вырăнта типĕ курăк çунма пуçланă. Вут-çулăма вăхăтра сÿнтернĕ. Вут хыпса илнĕ пĕтĕмĕшле лаптăк 2,5 гектарпа танлашнă.

Баймак, Гафури районĕсенче,  Кумертау хулинче 34,8 гектар  çĕр лаптăкĕ çинче типĕ ÿсен-тăран çуннин 25 тĕслĕхне шута илнĕ. Икĕ пушар - Ишимбайпа Ĕпхÿ районĕсенче тата Агидель хулинче, виççĕшĕ - Эльшей районĕпе Сибай хулинче, тăваттăшĕ  Хайбулла районĕнче тухнă.  Абзелил районĕнче вара ултă вырăнта вут-çулăм алхаснă. Пурне те сÿнтернĕ, инкек курнисем пулман.