Кайăксем – пирĕн туссем

Кашни çул апрель уйăхĕн 1-мĕшĕнче экологи уявне – Пĕтĕм тĕнчери кайăксен кунне – паллă тăваççĕ. Вĕçен кайăксен кунне пĕтĕм тĕнчипе XX ĕмĕр пуçламăшĕнчех уявланă. Праçник кунне ăнсăртран суйласа илмен: апрель уйăхĕнче çунатлă çул çÿревçĕсенчен чылайăшĕ вăрăм çула тата тĕрлĕ чăрмавсене парăнтарса тăван йăвасем патне таврăнать.

Ачасене асăннă уявпа паллаштарас, çунатлă туссене пулăшма хăнăхтарас тĕллевпе Шаран районĕнчи Тÿртÿллĕ ялĕнчи вулавăш ĕçченĕ Разифа Никифорова «Çунатлă кÿршĕсем» вăйă-викторина ирттернĕ. Арçын ачасемпе хĕр ачасем библиотекарь çут çанталăкпа кайăксене сыхламалли тата упрамалли çинчен каласа панине тимлĕн итленĕ. Унтан ачасем «Тăрнасем» тата «Уйăпсем» ушкăнсене уйрăлса вăйă-викторинăна хутшăннă, çунатлă туссем çинчен мĕн пĕлнине кăтартса панă. Ушкăнсем кайăксемпе çыхăннă тупмалли юмахсен тупсăмĕсене шыранă, вĕсен ячĕсене пĕлнĕ, юмахри кайăксене аса илнĕ, ыйтусем çине хуравланă. Унсăр пуçне ачасем вулавăшра йĕркеленĕ «Кайăксен сассисем» кĕнеке куравĕпе паллашнă.

Шаран районĕ, Тÿртÿллĕ ялĕ.