«Пушкăрт урхамахĕ» фестивальте пушкăрт ăратлă лашасене ĕрчетессине сÿтсе явĕç

Унăн ĕçне Челябинскпа Эрĕнпур облаçĕсенчи пушкăртсен курултайĕсен делегацийĕсем, Раççĕйри тăванла тĕрĕк халахĕсен ăсчахĕсемпе общество хастарĕсем хутшăнĕç.

«Пушкăрт ăратлă лашасене шута илессипе çыхăнна çивĕч ыйтусем тата паянхи лару-тăру» темăпа Пушкăртстанра пушкăрт ăратлă лашасене сыхласа хăварас тата аталантарас енĕпе ĕçлекен «ИРАНДЫК» Ыркăмăллăх фончĕ çумĕнчи эксперт комиссийĕн председателĕ Акрам Хусаинов доклад тăвĕ.  Доклада сÿтсе явма ял хуçалăх наукисен докторĕ, ПР тава тивĕçлĕ наука ĕçченĕ Ираида Ахатова профессор, Пĕтĕм тĕнчери пушкăртсен Курултайĕн председателĕн çумĕ, Пушкăртстан Пуçлăхĕн çут çанталăк рессурсĕсемпе усă курасси тата экологи хăрушсăрлăхĕ енĕпе ĕçлекен канашлуçи Расих Хамитов, Пушкăртстанра пушкăрт ăратлă лашасене сыхласа хăварас тата аталантарас енĕпе ĕçлекен «ИРАНДЫК» Ыркăмăллăх фончĕн эксперчĕ Миннур Яратов хутшăнĕç.

Çавăн пекех Махмут Салимовăн «Башкорт аты» («Пушкăрт урхамахĕ») кĕнеке хăтлавĕ иртĕ. Мероприятие Челябинскри Михаил Вороновăн-Кушанковскийĕн пушкăртсене тата пушкăрт лашисене халалланă ÿкерчĕксен куравĕ илем кÿрĕ.

Аса илтеретпĕр, 2022 çулта «Пушкăрт урхамахĕ» фестиваль пуçласа иртнĕ. Иртнĕ çул вăл пĕлтерĕшĕпе пĕтĕм тĕнче шайне çĕкленнĕ. Пушкăрт ăратлă лашасене халăх хушшинче сарасси, лаша ĕрчетессипе кăмăс тăвас йăла-йĕркесене сыхласа хăварса аталантарасси, халăх ремеслипе наци вăййисене пулăшу парасси фестивалĕн тĕп тĕллевĕ пулса тăрать.

Юрий СНЕГОПАД.