Салават Юлаев паттăрăн йĕнерне Абу-Дабинче кăтартĕç

«Ирандык» ыркăмăллăх фончĕ Пушкăртстан Республикине Пĕрлешнĕ Араб Эмиратĕнчи (ОАЭ) Абу-Даби хулинче август уйăхĕн 31-мĕшĕнчен пуçласа сентябрĕн 8-мĕшĕччен иртекен Пĕтĕм тĕнчери сунар тата лаша спорчĕн куравне каяссине йĕркелет. Кунта алă вăйĕпе хатĕрленĕ паянхи пушкăрт йĕнерне тата Салават Юлаевăн историре юлнă йĕнер копине курма пулĕ. Çавăн пекех хальхи йĕнерсене хатĕрлессипе мастер-класс йĕркелĕç.

Иртнĕ çул «Пушкăрт урхамахĕ» Пĕтĕм тĕнчери фестивальте Пушкăртстан Республикин Наци музейĕ хăйне евĕр экспонатсем кăтартнă. Вĕсен шутĕнче «Пушкăрт урхамахĕн историйĕ» кураври пĕр йĕнер тĕп тата пĕлтерĕшлĕ экспонат пулса тăнă. Ăна музее Салават районĕнчи Кармакларово ялĕнчи ватă çынсем 1925 çулта парнеленĕ пулнă. Легенда тăрăх, вăл Салават Юлаев республика наци паттăрĕн пулнине çирĕплетеççĕ.

Аса илтеретпĕр, Пĕтĕм тĕнчери «Пушкăрт урхамахĕ» пушкăрт ăратлă лаша фестивалĕ Баймак районĕнчи Графское кÿлĕ хĕрринче август уйăхĕн 15-16-мĕшĕсенче иртет.

Юрий СНЕГОПАД.

Сăн ÿкерчĕкпе Пушкăртстан Республикин Наци музейĕ тивĕçтернĕ.