Пушкăртстанри пукане театрĕ Чăваш Енре икĕ награда çĕнсе илнĕ

Спектакле Надежда Беззубовапа Александр Верхоземский лартнă.

«Карусель сказок» фестивале Чăваш Енре 2019 çултанпа иртереççĕ. Пуçласа ăна Шупашкар хулин 550 çулхи юбилейне халалланă пулнă. Хальхи пиллĕкмĕш пукане театрĕсен фестивалĕ виçĕ пулăма пĕрлештернĕ: А. С. Пушкин çуралнăранпа 225 çул, Ленинград блокадине татнăранпа 80 çул, Шупашкар хулин 555 çулхи юбилейĕ çитнине.

Кăçал программăна 15 регионăн театр ушкăнĕсем хутшăннă: Мускав, Белгород, Владимир, Волгоград, Ростов, Ульяновск, Ярославск облаçĕсенчен, Краснодар крайĕнчен, Пушкăртстан , Мари Эл , Мордови, Тутарстан, Удмурти республикисенчен. Чикĕ леш енчен Азербайджан тата Казахстан хутшăннă.