Тетĕрпуçĕнчи «Çеçпĕл» ансамбль «Баурсак Фест» фестиваль диплопне тивĕçнĕ

Çак мероприяти çтерлĕпуçсемшĕн брендлă уяв шутланать. Ăна юбилейлă теме те юрать пулĕ, мĕншĕн тесен вăл пиллĕкмеш хут иртнĕ тата Пушкăртстанра пурăнакан Халăхсен наци тумĕ кунĕпе тÿр килнĕ. Фестивале пултарулăх командисем кÿршĕллĕ Мияки, Çтерлĕ, Федоровка районĕсенчен килсе çитнĕ. Çавăн пекех инçе çула Куюргазă, Кушнаренково, Чекмагуш  тăрăхĕнчи артистсемпе ал ĕç ăстисем кĕскетме кăмăл тунă. Паллах, хуçасем хăйсем те  уява тĕплĕн те анлă хатĕрленнине палăртмалла.

«Район чысне 5 коллектив хÿтĕлерĕ, эпир Тетĕрпуç ялĕнчи «Çеçпĕл» ансамбль «Пирĕн район бренчĕ» номинацинче иккĕмĕш  вырăн йышăнтăмăр, дипломпа парнене тивĕçрĕмĕр. Эпир сумлă хăнасен умĕнче баурсак пĕçернипе çеç мăнаçланмарăмăр, вĕсене хамăр хатĕрленĕ йăвапа, чăваш сăрипе сăйларăмăр, чăваш хĕрарăмĕн ĕçченлĕхĕпе паттăрлăхĕ, правурлăхĕ çинчен чылай каласа патăмăр. Çавна пула жюри пайташĕсем те, район пуçлăхĕ Рустам Рахмангулов та пиртен чылайччен уйрăлаймарĕç», - тесе пĕлтерчĕ редакцине «Çеçпĕл» ушкăн ертÿçи Ирина Петрова.

Мĕнех, асăннă районта пурăнакан пĕртен-пĕр чăваш ялĕнчи йăхташсем хăйсене çапла çÿллĕ шайра кăтартма пултарни савăнтарать. Малашне те вĕсене хамăр халăх чысне тивĕçлĕ хÿтĕлеме ăнăçусем сунатпăр.

Юрий СНЕГОПАД.