Пултарулăхпа ăслăлăх интеллигенцийĕсен форумĕнче гуманитари енĕпе пĕрле ĕçлес ыйтусене сÿтсе явĕç

Пăхăнман Патшалăхсен Пĕрлешĕвĕн Гуманитари енĕпе ĕçлекен патшалăхсен хушшинчи фондăн директорĕн тивĕçĕсене пурнăçлакан Анатолий Иксанов пĕлтернĕ тăрăх, йăлапа килĕшÿллĕн форума Пăхăнман çĕршывсен тĕп хулисем йышăнаççĕ. Вăл виçĕ хутчен Мускавра иртнĕ. Кăçал форум пуçласа регион центрĕнче – Ĕпхÿре – иртет.

Форумăн тĕп теми - «Пăхăнман Патшалăхсен Пĕрлешĕвĕ: пĕтĕмĕшле хаклăхсем тата нумай енлĕ культура». Унта СНГ çĕршывĕсен 200 ытла представителĕ хутшăнĕ. Наукăпа вĕрентÿ тата ÿнер деятелĕсем професси тĕлĕшĕпе пĕрле тачă çыхăнса ĕçлессине сÿтсе явĕç: вĕрентÿ сферинче çĕнĕ форматсемпе ĕçлесси, волонтер ĕçĕ-хĕлĕ обществăна аталантармалли юхăм, культурăсем хушшинчи диалога йĕркелемелли интеграци процесĕсем. 

Мероприяти шайĕнче Пăхăнман Патшалăхсен Пĕрлешĕвĕнчи профильлĕ гуманитари пĕрлешĕвĕсен, пултарулăхпа çыхăннă аслă шкулсен ертÿçисен, инклюзивлă проектсем йĕркелессипе тăрăшакан специалистсен тĕлпулăвĕсем, кинематографистсен çавра сĕтелĕсем иртĕç. Уйрăм тĕлпулу Тăван çĕршывăн Аслă вăрçинче çĕнтернĕренпе 80 çул çитнине уявлама хатĕрленессипе çыхăннă. Форума вĕçлесе лауреатсене «Пĕрлешĕвĕн  çăлтăрĕсем» патшалăхсем хушшинчи тĕп премипе чыслĕç. Ăна ÿнер, наукăпа вĕрентÿ сферисенче пысăк çитĕнÿсем тунисем илме тивĕçĕç.

Унсăр пуçне «Пĕрлешĕвĕн дебючĕсем» çамрăксен преми лауреачĕсене те палăртса хăварĕç. Мероприяти хăнисемпе участникĕсене Çамрăксен симфони оркестрĕ концерт кăтартса савăнтарĕ.