Пушкăртстанри Кыш Бабай резидентне 2 пин çын çитсе курнă

Республикăра декабрь уйăхĕн вĕçĕнче уçнă Кыш Бабай (Хĕл Мучи) резиденчĕ (вăл Çтерлĕ çывăхĕнчи Торатау шихан айĕнче вырнаçнă) регионта пурăнакансемпе хăнасемшĕн юратнă та кăмăла каякан вырăна çаврăннă. Малтанхи кăтартусем тăрăх, январь уйăхĕн 2-мĕшĕ тĕлне Мускав, Санкт-Петербург, Тольятти, Екатеринбург, Челябинск тата Раççейри ытти хуласенчен çак вырăна 2 пине яхăн çын çитсе курнă. Туристсен шучĕ кашни кун ÿссе пынине палăртмалла.

- Чылай чухне ачасем Кыш Бабая Сергей Есенинăн «Шурă хурăн» сăввине каласа параççĕ, - тет Хĕл Мучин мăнукĕ Кархылыу (Юр Пике).

Пушкăртстан Пуçлăхĕ Радий Хабиров çырса пĕлтернĕ тăрăх, кунта Çĕнĕ çул каникулĕ тĕлне ачасемпе аслисем валли пысăк та пуян программа хатĕрленĕ. Кыш Бабай резидентĕнче лашасемпе снегоходсем çине ларса ярăнма, тĕрлĕ вăй-кулăсемпе ăсталăх класĕсене хутшăнма пулать. Этнокомплекс кашни кунах 11.00 сехетрен пуçласа 23.00 сехетчен ĕçлет.

Юрий СНЕГОПАД.