Çурма финалта мала тухнă 31 çынран конкурс пĕтĕмлетĕвĕсем тăрăх, Пелепей районĕнчи тĕп больницăн акушерки Нина Кукушкина мала тухнă.
- Конкурса хутшăнма йывăрах пулмарĕ. Эпĕ хамăн тĕп ĕçе тунипе пĕрле медицина колледжĕнче студентсене те вĕрентетĕп. Çавăнпа та маншăн теорипе практика пайĕ ют мар. Урăх специальность суйласа илме кăмăл пулман-и тесе ыйтсан эпĕ пĕр иккĕленмесĕр «чун туртни çакă» тенĕ пулăттăм. Хула урамĕсемпе иртсе пынă чух нумайăшсем тĕл пулсан сывлăх сунаççĕ, тав тăваççĕ. Ывăл: «Ку кам?»,- тесе ыйтать. «Пĕлместĕп, ахăртнех ача çураттарнă пулĕ»,- тетĕп. Ача çуратса, çĕнĕ пурнăç парнеленĕ телейлĕ аннен куçĕсенчи туйăмсене нимĕнпе те танлаштараймастăн. Çакă малалла ĕçлеме тата пурăнма вăй-хăват парать,- хăйĕн шалти туйăмĕсемпе уçса панă çĕнтерÿçĕ.
«Чи лайăх акушер» ята çĕнсе илессишĕн пĕтĕмĕшле Пушкăртстанри 1516 медицина сестри кĕрешнĕ. Жюри вĕсене 5 номинаципе хак панă, çав шута йывăрлă хĕрарăмсене тата тин çуралнă пепкесене пĕтĕмĕшле реанимаци тăвасси, коммуникативлă хăнăхусене кăтартса парасси кĕреççĕ.
Юрий СНЕГОПАД.