«Янăравлă чĕрĕ сăмах» сăвă вулакансен конкурсĕ иртет

Унăн тĕллевĕсем: çамрăксене Пушкăртстан Республикин хальхи литература эткерĕпе (чăвашла тата тутарла) паллаштарасси; янравлă сăмахăн йăли-йĕркине чĕртесси тата аудитори умне тухса калаçас ăсталăха аталантарасси; тăван чĕлхепе çырнă илемлĕ литературăпа кăсăклантарасси, вулав культурине аталантарасси; çамрăксем хушшинче пултаруллă сăвă вулакансене тупса палăртасси.

Республика шайĕнчи конкурса 2024 çулхи февраль уйăхĕн 19-21-мĕшĕсенче Google Meet (приложенисем кирлĕ мар, вăл браузертан ĕçлет) платформа çинче онлайн мелпе ирттерĕç. Унăн ссылкине конкурса заявка тăратнă хыççăн парĕç. Мала тухнисене чысласси 2024 çулхи мартăн 29-мĕшĕнче Ĕпхÿ наукăпа технологисен университечĕн Çтерлĕ филиалĕнче Çтерлĕ хули, Ленин урамĕ, 49-мĕш çурт адреспа иртĕ.

Сăвăсене тутарла тата чăвашла пăхмасăр каламалла. Тутар чĕлхипе тухса калакансем Расим Рахматуллин (Расим Шафи-Рахмата) поэт сăввине е Камиль Фазултдинов (Камиль Фазлый) проза произведенин  сыпăкне вуласа памалла. Чăвашсем Василий Антонов, Николай Леонтьев поэтсен сăввисене е Максим Данилов-Чалдун, Василий Антонов проза хайлавĕсен сыпăкне пăхмасăр каласа памалла. Конкурс икĕ номинаципе иртет: поэзи тата проза тексчĕсене 3 минутран ытла мар вуласси.

Ăмăртăва 8, 9, 10, 11 класс вĕренекенĕсем, аслă шкулсен, училищăсемпе колледжсен студенчĕсем хутшăнма пултараççĕ. Заявкăна [email protected] электронлă адреспа февраль уйăхĕн 15-мĕшĕччен ярса памалла. Çĕнтерÿçĕсене дипломсемпе, электронлă сертификатсемпе, спонсорсем уйăрнă ятарлă парнесемпе чыслĕç. Конкурс координаторĕсем: Насима Анваровна Мукимова доцент - 8 987 033 74 09, 8 961 046 09 73; Лариса Валерьевна Коротаева доцент - 8 987 249 91 97.