- Приз фондне пысăклатнине кура бюджета та шайлаштарма тÿр килчĕ. Çырусене шута илсе финала тухнисем хăйсене палăртас теççĕ, - ăнлантарса панă Эльвира Аиткулова. – Çак майпа конкурсăн приз фончĕ 2024 çулта 8 миллион та 400 пин тенке ÿснĕ. Ку питĕ савăнтарать, мĕншĕн тесен ялсенче тирпей-илем кĕртессипе ытларах ĕç пурнăçланĕ, çынсем хăйсен ĕçĕпе тăрăшулăхĕн çимĕçĕсене курĕç.
Ял-сала çыннисем пысăк хавхаланупа конкурса хутшăнаççĕ. Иртнĕ çулхи сентябрь уйăхĕн 1-мĕшĕ – ноябрь уйăхĕн 30-мĕшĕнче иртнĕ муниципаллă тапхăра 1070 ял хутлăхĕ заявка панă. Январь уйăхĕн 18-мĕшĕнче иртнĕ республикăри йĕркелÿ комитечĕн ларăвĕнче вĕсене чи пысăк, пысăк, вăтам тата пĕчĕк ялсен ушкăнне пайланă.
Пĕтĕмлетÿсене Ĕпхÿ хулинчи «Торатау» конгресс-холра тăвĕç.
«Урă ял» конкурс ĕçкĕпе кĕрешнисĕр пуçне чылай социаллă пĕлтерĕшлĕ ыйтусене татса пама пулăшать. Çапла майпа 4 çул хушшинче конкурса хутшăннă ялсен территорийĕсенче 30 çĕнĕ ача-пăчапа спорт лапамĕ, 12 паркпа обществăлла вырăн пулма пултарнă, урамсем йĕркене кĕнĕ, çĕнĕ коммуналлă техника, шыв башни туяннă.