Чăваш Ен хĕрĕ – Раççейри чи илемлĕ пике

Пикесем чăннипех те маттур та ăста, пултаруллă пулнипе тĕлĕнтермеллипех тĕлĕнтернĕ. Вĕсене Дмитрий Маликов музыкант, Юлиана Караулова юрăç, Владимир Матецкий композитор, Игорь Чапурин дизайнер, «Раççей пики» наци конкурсĕн тĕп директорĕ Анастасия Беляк тата Игорь Кимяшов стилист хак панă.
«Раççей пики – 2024» ята тивĕçнĕ Валентина Алексеева 18 çулта. Пике Шупашкарти 5№ гимназире вĕреннĕ, ăна ылтăн медальпе пĕтернĕ. Кăларăм каçĕ иртиччен, çулталăк çурă маларах, хĕр пирвайхи хут илемлĕх ăмăртăвне хутшăннă. Вуннăмĕш класра вăл «Чăваш Ен пики – 2023» ята çĕнсе илнĕ пулнă. Халĕ Валентина Мускаври медицина университетĕнче пĕрремĕш курсра вĕренет, тухтăр пулма ĕмĕтленет. Вăл «Пĕтĕм тĕнче пики» титула çĕнсе илме сăмах панă.
– Сцена çине тухнă чухне эпĕ çĕнтерессе шанманччĕ, ун пирки шухăшламан та. Ман шутпа, конкурса хутшăнма пултарни, сцена çине тухма май пулни, савăнни пысăк пĕлтерĕшлĕ. Ытти мĕнле пулмалла – çавăн пек пулать. Малашнехи плансем Раççей чысне Мексикăра иртекен «Пĕтĕм тĕнче пики» конкурсра тивĕçлĕ хÿтĕлессипе çыхăннă. Эпĕ мĕн тума пултарнипе пултарайманнине тума тăрăшăп, – тенĕ Валентина.
Ирида МАТНИЯЗОВА.