Чăваш капелли Пушкăртстанра пулĕ

Кăçалхи сентябрь уйăхĕн 27-мĕшĕнчен пуçласа октябрĕн 1-мĕшĕччен Чăваш Республикинчи Культура министерствин «Симфони капелли» бюджетлă учрежденийĕ Пушкăртстанра пурăнакан ентешсене «Симфо-фолк кĕвви мĕнпур вăхăта» («Симфо-фолк музыка на все времена») концерт программипе паллашма сĕнет. Илемлĕх ертÿçи тата тĕп дирижер – Раççей Федерацийĕн халăх артисчĕ Морис Яклашкин. «Симфо-фолк кĕвви мĕнпур вăхăта» çĕнĕ кĕвĕ-юрă проекчĕ симфони оркестрĕпе фольклор коллективĕн çÿллĕ шайри пултарулăх ăсталăхĕн пуянлăхĕ пулса тăрать, вĕсенче кашнинех хăйне евĕрлĕх тата пултарулăх уйрăмлăхĕ упранса юлнă. Кунта юрă-кĕвĕ янрани çĕнĕ стильпе тата çĕнĕ уйрăм паллăпа илтĕнет. Тĕрĕсрех каласан халăх (этно) стилĕпе.
Капелла пултарулăхĕпе Кармаскалăпа Авăркас, Пелепей районĕсенче, Çтерлĕ хулинче, Приютово поселокĕнче пурăнакансемпе хăнасем паллашма пултараççĕ, артистсем шăпах çак тăрăхсене çитме палăртаççĕ. Çитес номерте эпир вулакансене гастроль маршручĕпе тĕплĕнрех паллаштарăпăр.
Алина ОКРУЖНОВА,
капеллăн администраторĕ.