«Мерчен» пултарулăхне альбома кĕртĕç

– «Антоновка рекордс» сасă режиссерĕсем Культура министерствин пайĕпе тата Халăх пултарулăхĕн центрĕпе тачă çыхăнса ĕçленипе виçĕ пин çухрăм иртнĕ, Ĕпхÿпе Бакалă, Архангельскпа Авăркас, Элшейпе Давлекан, Зианчурапа Баймак, Абзелил районĕсене тата Ĕпхÿпе Çтерлĕ хулисене çитнĕ, – пĕлтернĕ министерствăра.
Июль уйăхĕн 15-30-мĕшĕсенче юрă-кĕвĕ лейбл представителĕсем республикăра халăх юррисене юрлакан коллективсемпе тĕл пулса вĕсен юррисене тата фольклор композицийĕсене видео çине ÿкерчĕç. Авăркас районĕнчи «Мерчен» чăваш юррисен ансамблĕ шăрантарнă 15 юрра тата 3 фольклор композицине видео çине ÿкерме кăмăл турĕç.
«Антоновка рекордс» юрă-кĕвĕ лейбл представителĕсем килессине июнь уйăхĕн 20-мĕшĕнчех пĕлтĕмĕр. Ытти чăваш ялĕсенчи культура çурчĕсенче ĕçлекенсене çакăн пирки пĕлтертĕмĕр, анчах вĕсем хутшăнасшăн пулмарĕç. Юламан ялĕнчи культура çуртĕнче вăй хуракан Алена Федоровапа Елизавета Федорова «Мерчен» ансамбль пайташĕсем пулса мĕнпур номерсенче те хăйсен пултарулăхне кăтартрĕç. Вĕсем ертсе пынипе пултаруллă коллектив районта йĕркелекен йăла-йĕркесене хутшăнать. Мерченсем Ĕпхÿре «Салам» фестивальте, Давлекан районĕнче иртнĕ гастрольсенче, район шайĕнче йĕркелекен сабантуйсенче хăйсене çÿллĕ шайра кăтартаççĕ.
Ансамблĕн «лауреат» ятне илме тивĕçнĕ солисчĕсем – Н.Петрова тата Н.Федорова. Хастар та пултаруллăскерсем авалхи халăх юррисене шăрантарса концерт программине илем кÿчĕç. Чăваш юррисене ăста юрлакан Н.Васильевпа Н.Орлов пĕрле юрласа савăнтарчĕç.
Чăваш халăхĕн арçын туйне видео çине ÿкернĕ чухне Мияки районĕнчи Çĕнĕ Хурамал ялĕнче пурăнакан Виталий Захаров шăпăрçă шăхличпе, параппанпа тата шăпăрпа авалхи кĕвĕсене каларĕ. Инструментсен сассисем татах та илемлĕрех янраччăр тесе баян та хутăштартăмăр. Туй халăхĕ хĕр хапхи умĕнче юрă юрланă, хапхаран кĕнĕ, мăн кĕрÿ сăмах каланă хыççăн туй пуçланчĕ. Çаксене пурне те видео çине çыртарчĕç.
«Антоновка рекордс» юрă-кĕвĕ лейбл ăстисем авалхи юрăсен альбомне кăларма шут тытнă. Асăннă альбома «Мерчен» ансамблĕн 15 халăх юрри тата виçĕ авалхи йăли кĕрĕ. Вĕсене кăшт вăхăт иртсен интернетра курма пулĕ.
Николай ВАСИЛЬЕВ,
«Мерчен» ансамбль ертÿçи.
Авăркас районĕ.