Ачасене чир ертнĕ педагогсен тĕлĕшпе административлă мерăсем йышăнĕç

Çĕнĕ вĕренÿ çулĕ тĕлне республикăри педагогсен 80 проценчĕ, ытларах пулсан тата та лайăхрах, вакцинаци  тутарттармалла. ПР Вĕрентÿ министерстви учительсене сентябрь уйăхĕн 1-мĕшĕччен прививка тума сĕннĕ. Вакцинаци валли медицина енчен чарусем çук, анчах Профилактика прививкисен наци календарĕпе килĕшÿллĕн прививка туман педагогсене вĕрентÿ ĕçĕнчен хăтарĕç. Айбулат Хажин сăмахĕсем тăрăх, ĕçрен ĕç укçисĕр е ĕç укçипе хăтарассине эпидеми лару-тăрăвне шута илсе йышăнĕç. Вакцинаци процедури иртнисене ĕç укçи сыхланса юлакан канмалли кун парĕç. Хавхалантармалли мелсем пирки июль уйăхĕн 15-мĕшĕнчи приказ çинче çырнă. Çавăн пекех ĕçченсене преми парасси пирки те каланă. Айбулат Хажин палăртнă тăрăх, учительсем – уйрăм категори, вĕсем ачасем, çын хушшинче нумай пулаççĕ. Çавăнпа хăйсене те, ыттисене те упрамалла.

Брифинга хутшăннисем  - лицей тата шкул ертÿçисем  - вĕренÿ учрежденийĕнче вакцинаци тăвас ĕç хăвăрт пыни çинчен пĕлтернĕ. Учительсем ку йышăнăва ăнланса, хăрушсăрлăх ыйтăвĕ çинчен шутласа тăваççĕ.

Республикăри вĕрентÿ министрĕ палăртнă тăрăх, çĕнĕ вĕренÿ çулĕнче те маска режимĕ, пĕр-пĕрин хушшинчи дистанцие пăхăнасси, кабинет системи, санитари мерисем сыхланса  юлĕç. Ачасене маска тăхăнма хистемеççĕ. Ашшĕ-амăшĕ кирлĕ тесе шутлать пулсан çеç. Ача кăшăлвируспа чирлесен, ăна занятисенчен хăтармасăр дистанциллĕ вĕрентĕве куçарĕç.

Надежда РОДИОНОВА.