- Музейсем астăвăм управçи пек шутланаççĕ, вĕсенче иртнĕ пурнăç чĕрĕлет. Тĕрлĕ халăхсен кулленхи пурнăçĕпе, ытти çĕршывсен шăписен истори уйрăмлăхĕсемпе, иртнĕ ĕмĕрсенче çынсем мĕнле пурăннине шăпах музейсенче пĕлме пулать, - тесе палăртнă статистика ĕçченĕсем.
Республикăри Культура министерствин кăтартăвĕсемпе килĕшÿллĕн 2022 çулта регионта 107 музей ĕçленине шута илнĕ. Вĕсенчи тĕп фондсенче культурăпа истори пурлăхĕпе паллаштаракан 624 пин экспонат упранать.
- Иртнĕ çул республикăри музейсене 1,936 млн çын çитсе курнă. Кашни пĕр пин çын пуçне 474 çынпа тÿр килет, - тенĕ статистиксем. – Музей ĕçченĕсем 37 пин экскурси, çавăн пекех 11 пине яхăн культурăпа вĕрентÿ мероприятийĕ йĕркеленĕ.
Май уйăхĕн 20-мĕшĕнче Раççейре йăлана кĕнĕ тăрăх, культурăпа ÿнер уявĕ – «Музейсен каçĕ - 2023» («Ночь музеев – 2023») Пĕтĕм Раççейри акци – иртĕ. Çак кунхине музейсем хăнасене 18.00 сехетрен пуçласа 23.00 сехетччен йышăнĕç.