«Башавтотранс» ĕçченĕсем ĕçе наци тумĕсемпе тухнă

Паян «Башавтотранс» ĕçченĕсем Наци костюмĕн кунне халалланă акцие хутшăннă. Предриятин филиалĕсенче наци тумĕсем тăхăнса дефилесем ирттереççĕ, видеосюжетсемпе сăн ÿкерчĕксен интернет-эстафетине хутшăнаççĕ. Çавăн пекех рейса тухакан автобуссем çинче ĕçлекенсем республикăра пурăнакан халăхсен наци костюмĕсене тăхăннă тесе пĕлтернĕ предприятин пресс-службинче.

Асăннă уява республикăра виççĕмĕш çул çулталăкра икĕ хутчен паллă тăваççĕ: апрель уйăхĕн виççĕмĕш эрне кунĕнче тата сентябрĕн иккĕмĕш эрне кунĕнче. Уявăн тĕп тĕллевĕ республикăри халăхсен наци культурине упраса хăварасси тата аталантарасси пулса тăрать. Çак кун регионти халăхсен историпе культурине тепĕр хут аса илме, уйрăмах тимлĕх уйăрма, ăша хывма май парать.

Юрий СНЕГОПАД.